Dyshime për ngacmim seksual dhe keqpërdorim detyre, IPK kërkon suspendimin e pesë policëve

Inspektorati Policor i Kosovës (IPK) ka rekomanduar suspendimin e pesë zyrtarëve policorë në dy raste të ndara në Prishtinë dhe Gjilan, nën dyshimin për përfshirje në vepra të ndryshme penale.

Sipas njoftimit të IPK-së, tre zyrtarë policorë të Stacionit Policor Jugu në Prishtinë dyshohen për veprat penale “Ngacmimi seksual” dhe “Kontrollimi i kundërligjshëm”.

Rasti dyshohet të ketë ndodhur pas mesnatës së 15 tetorit, në afërsi të rrethrrotullimit në lagjen Lakërishte në Prishtinë.

Sipas pretendimeve të ankueses, derisa ishte duke drejtuar veturën, ajo ishte ndaluar dhe kontrolluar nga zyrtarët policorë. Më pas, ata i kishin thënë të vazhdonte në drejtim të fshatit Çagllavicë, me qëllim të kryerjes së veprimeve me karakter seksual.

Lidhur me rastin, me udhëzim të prokurorit të Prokurorisë Themelore në Prishtinë, është iniciuar procedurë penale për veprat e dyshuara.

IPK ka bërë të ditur se do të ndërmarrë veprime të tjera hetimore, në koordinim me Prokurorinë e Shtetit, për të sqaruar plotësisht rrethanat dhe pretendimet e ngritura.

Dy policë të tjerë dyshohen për keqpërdorim të pozitës në Gjilan

Në rastin e dytë, IPK ka rekomanduar suspendimin e dy zyrtarëve policorë të Stacionit Policor në Gjilan, nën dyshimin për kryerjen e veprës penale “Keqpërdorimi i pozitës apo autoritetit zyrtar”.

Sipas të dhënave fillestare të hetimit, më 15 tetor 2026, rreth orës 23:00, në Gjilan, zyrtarët policorë dyshohet se kanë ndaluar një qytetar dhe e kanë futur në veturën zyrtare.

Gjatë kësaj ngjarjeje, pretendohet se ndaj qytetarit është ushtruar abuzim verbal dhe i është cenuar privatësia, përfshirë marrjen e telefonit të tij pa urdhër të Prokurorisë së Shtetit.

Dyshimet fillestare sugjerojnë se veprimet e pretenduara mund të kenë lidhje me një ankesë të parashtruar nga i njëjti qytetar në korrik të vitit 2026, ndaj zyrtarëve policorë në fjalë, për dyshime për keqtrajtim dhe tejkalim të autorizimeve policore.

Inspektorati Policor i Kosovës ka ritheksuar përkushtimin për hetimin e dyshimeve për veprime të kundërligjshme nga zyrtarët policorë, me qëllim të garantimit të llogaridhënies dhe forcimit të integritetit të Policisë së Kosovës./Telegrafi/