“Çohuni nga kafja!”
Protestuesit zbresin në Ish-Bllok dhe u bëjnë thirrje qytetarëve t’i bashkohen protestës
Pas përfundimit të tubimit para Kryeministrisë, protesta kundër projektit turistik në Zvërnec mori një drejtim të ri. Qindra protestues marshuan drejt zonës së Ish-Bllokut, aty ku zakonisht Tirana e mbrëmjes mblidhet në kafene, bare dhe restorante.
Me pankarta dhe thirrje kundër qeverisë, të rinjtë vijuan marshimin në rrugët e mbushura me qytetarë, duke kërkuar jo vetëm anulimin e projektit të debatueshëm në Zvërnec, por edhe dorëheqjen e kryeministrit Edi Rama.
Një nga momentet që tërhoqi më shumë vëmendje ishte kur protestuesit iu afruan lokaleve të zonës dhe nisën t’u drejtoheshin klientëve të ulur në tavolina. Në videot e shpërndara në rrjetet sociale dëgjohen thirrjet: “Çohuni nga kafja!” dhe “Ejani me ne!”.
Mesazhi i protestuesve ishte i qartë: sipas tyre, koha për të ndjekur zhvillimet politike nga tavolinat e kafeneve ka mbaruar dhe qytetarët duhet të bëhen pjesë aktive e reagimit publik.
Pamjet krijuan skena të pazakonta në zemër të Ish-Bllokut. Disa qytetarë i përshëndetën protestuesit me duartrokitje, të tjerë i ndoqën me interes, ndërsa pati edhe nga ata që preferuan të vazhdonin qetësisht kafenë e mbrëmjes.
Protesta për projektin në Zvërnec ka hyrë tashmë në ditët e saj më intensive, duke mbledhur kryesisht të rinj që kërkojnë më shumë transparencë për investimin e planifikuar në zonën bregdetare. Organizatorët kanë paralajmëruar se mobilizimi do të vazhdojë edhe në ditët në vijim.
Ndërsa marshimi kalonte mes tavolinave të mbushura të Ish-Bllokut, një pyetje dukej se qëndronte pezull mbi kryeqytet: a do të vazhdojë Tirana ta ndjekë protestën nga karrigia e kafenesë, apo do të zbresë në rrugë për t’u bërë pjesë e saj?
Shikoni nje grup fotosh nga dita e trete e protestes
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.