DANIMARKË – Hakerohen të dhënat e 8,8 milionë personave

KOPENHAGË, 5 tetor /ATSH-ANSA/ – Hakerët kanë depërtuar në regjistrin kombëtar të Danimarkës dhe kanë pasur akses në të dhënat personale të rreth 8,8 milionë personave, njoftoi Ministria daneze për Çështjet Digjitale.

Administrata e regjistrit kombëtar danez CPR konfirmoi se persona të paautorizuar kanë siguruar në mënyrë të paligjshme akses, veçanërisht në emra, adresa dhe numra CPR numrat personalë të identifikimit social, të rreth 8,8 milionë personave të regjistruar.

Në mesin e personave të prekur përfshihen edhe individë që kanë vdekur ose janë larguar nga Danimarka.

“Bëhet fjalë për një incident jashtëzakonisht të rëndë”, deklaroi ministrja daneze për Çështjet Digjitale, Christina Egelund.

Ajo shtoi se autoritetet po punojnë për të përcaktuar shkallën e plotë të incidentit dhe për të kuptuar se çfarë të dhënash janë komprometuar.

Danimarka ka rreth 6,0 milionë banorë, por regjistri kombëtar përmban të dhëna për rreth 11 milionë persona, pasi përfshin gjithashtu informacion mbi persona të vdekur dhe njerëz që janë larguar nga vendi.

Hetimet për incidentin janë në vazhdim dhe autoritetet daneze po përpiqen të përcaktojnë kush qëndron pas sulmit, si u sigurua aksesi dhe cilat të dhëna janë përdorur ose kopjuar.