“Dasma e vitit” po afron: Dua Lipa dhe Callum Turner në Palermo!

Në prag të dasmës së tyre madhështore në Siçili, këngëtarja me origjinë shqiptare Dua Lipa dhe aktori Callum Turner po shijojnë momentet e fundit të qetësisë përpara nisjes së festimeve, që siç raportohet do të kushtojnë rreth 1 milion paund.

Çifti u pa mëngjesin e kësaj të enjteje, më 4 qershor, duke kaluar momente relaksi në ballkonin e suitës së tyre luksoze në hotelin “Villa Igiea”, në periferi të Palermos, ku një natë qëndrimi ka një kosto prej 6,000 paund.

Dua Lipa u shfaq e veshur në mënyrë të thjeshtë me një këmishë të lehtë blu, bikini dhe një fund plazhi, ndërsa kishte vendosur edhe një kapele sportive mbrapsht. Ndërsa bashkëshorti i saj, Callum Turner, u pa i veshur me këmishë dhe pantallona të shkurtra, teksa shijonin pamjen nga Deti Mesdhe.

Sipas raportimeve, çifti ka mbërritur në Siçili me avion privat një natë më parë, ndërsa dasma tre-ditore pritet të mbledhë rreth 300 të ftuar, përfshirë emra të njohur të showbiz-it. Në listën e të ftuarve përfliten emra të njohur si Elton John, Olivia Dean, Mark Ronson dhe Charli XCX, ndërsa disa burime pretendojnë se do të ketë edhe performanca speciale gjatë eventit.

Festimet do të zhvillohen në disa vende në Palermo, përfshirë vila historike dhe ambiente ekskluzive të mbyllura për publikun. Bëhet e ditur se janë marrë masa të rrepta sigurie, përfshirë truproja, zona të kufizuara dhe marrëveshje konfidencialiteti për stafin.

Ndërkohë, pritshmëritë janë të larta edhe për pamjen e Duas, e cila pritet të veshë një fustan të personalizuar Versace, pasi më parë ka vizituar Milanon për të finalizuar detajet e tij.

Dasma e çiftit është përshkruar nga mediat ndërkombëtare si një nga eventet më të mëdha të showbiz-it të vitit, ndërsa qyteti i Palermos është kthyer në epiqendrën e vëmendjes botërore.

Dua Lipa dhe Callum Turner e bënë publike lidhjen e tyre në vitin 2024, pas daljes së parë së bashku në një afterparty në Londër, ndërsa në qershor 2025 këngëtarja konfirmoi fejesën e tyre në një intervistë për British Vogue.

Çifti kurorëzoi dashurinë me një ceremoni intime civile në Old Marylebone Town Hall, më 31 maj 2026, në Londër, të ndjekur nga familjarë dhe miq të ngushtë.