David Harbour thyen heshtjen për albumin e Lily Allen

Aktori i njohur i serialit Stranger Things, David Harbour, ka folur për herë të parë publikisht për albumin e ish-bashkëshortes së tij, Lily Allen, West End Girl, i cili trajton kryesisht fundin e martesës së tyre.

Në një intervistë të re për revistën Variety, të publikuar më 10 qershor, Harbour u pyet drejtpërdrejt për albumin dhe nuk e fshehu reagimin e tij.

“Besoj se çdo artist ka privilegjin të përdorë përvojat e veta për të krijuar art, ndaj e respektoj për këtë,” tha ai. “Por ishte e çuditshme.”
Aktori 51-vjeçar shtoi se nuk dëshiron të flasë më shumë për këtë temë, duke theksuar rëndësinë e privatësisë në jetën e tij personale.

“Nuk mund të them shumë më tepër, sepse është jeta ime private. Pavarësisht se shumë njerëz nuk më lejojnë ta kem private, unë e vlerësoj privatësinë dhe jetën e njerëzve me të cilët ndërveproj,” u shpreh Harbour.
Gjatë intervistës, ai nënvizoi se çdo histori ka më shumë se një këndvështrim.

“Historitë janë komplekse. E respektoj mënyrën se si ajo e ka shndërruar përvojën e saj në art. Por nuk ishte përvoja ime,” tha ai.
Çifti u nda zyrtarisht në shkurt të vitit 2025, pas katër vitesh martesë. Harbour dhe Allen u martuan në vitin 2020. Këngëtarja britanike është nënë e dy vajzave, Marnie dhe Ethel, nga martesa e saj e mëparshme me Sam Cooper.

Albumi West End Girl, i publikuar në tetor 2025, përmban këngë që aludojnë për krizën martesore dhe tradhtinë. Në një intervistë të mëparshme, ajo deklaroi se albumi është një përzierje mes realitetit dhe trillimit.

“E shkrova këtë album për vetëm 10 ditë dhe sot ndihem ndryshe për gjithçka që ndodhi. Të gjithë kalojmë ndarje dhe ato janë gjithmonë të dhimbshme, por jo gjithmonë ndihesh i shtyrë të shkruash për to ndërkohë që po i jeton,” kishte thënë Allen.
Këngëtarja mohoi gjithashtu se albumi ishte një formë hakmarrjeje ndaj ish-partnerit të saj, duke theksuar se projekti muzikor synonte më shumë të eksploronte sjelljen njerëzore sesa të sulmonte dikë personalisht.