De Winter refuzon ftesën e kombëtares, trajneri Van Bommel: Do ketë pasoja

Trajneri i Belgjikës, Mark van Bommel, ka shpallur zyrtarisht listën e lojtarëve për ndeshjet e ardhshme të Ligës së Kombeve në nëntor, kundër Turqisë dhe Italisë. Ajo që po tërheq vëmendjen nuk janë lojtarët e përfshirë, por një mungesë e theksuar: Koni De Winter.

Mbrojtësi i Milanit e ka refuzuar ftesën për në kombëtare, duke përmendur faktin se ai nuk është aktivizuar në asnjë nga njëmbëdhjetë ndeshjet e fundit të skuadrës – një periudhë që përfshin finalet e Kupës së Botës dhe katër ndeshjet e para nën drejtimin e ish-lojtarit të Bayernit të Mynihut.

De Winter, i cili ka regjistruar 8 paraqitje për kombëtaren e tij (duke luajtur gjithsej 463 minuta), u aktivizua për herë të fundit në qershor, gjatë një fitoreje në ndeshje miqësore kundër Kroacisë, kur zëvendësoi Alexis Saelemaekers-in në minutën e 67-të. Që atëherë, belgu ka qëndruar ose në stol, ose në tribuna.

Në vend të tij, Van Bommel ka thirrur Josué Kongolo-n e Genk-ut — i lindur në vitin 2006 — duke e preferuar atë para Spileers-it dhe Smets-it. Në skuadër bëjnë pjesë gjithashtu sulmuesi Hugo Cuypers dhe portieri i AZ Alkmaar-it, Jari De Busser.

Trajneri e shpjegoi mungesën e mbrojtësit qendror të “kuqezinjve” dhe thirrjen e mbrojtësit të Genkut, Kongolo, në këtë mënyrë:

“Kongolo u përfshi sepse Koni De Winter nuk ndihej në gjendje të mirë, duke qenë se nuk kishte luajtur gjatë Kupës së Botës apo në ndërprerjen e fundit për ndeshjet ndërkombëtare. Për këtë arsye, ai vendosi të mos i bashkohej skuadrës. Ne morëm në konsideratë edhe Spileers-in e Smets-in, por zgjodhëm Kongolon. Ai është një talent premtues për të ardhmen.”

Trajneri theksoi më tej se veprimet e lojtarit do të kenë pasoja: “Nuk bëhet fjalë vetëm për faktin se ai qëndroi në tribuna herën e kaluar; kjo është një situatë që zvarritet prej kohësh. Si trajner, duhet ta pranosh, por natyrisht, do të ketë pasoja afatgjata.”

Ende nuk ka komente. Bëhuni i pari që komenton.