Deçani kundër aktgjykimit të Hagës: Kërkohet drejtësi për ish-krerët e UÇK-së

Komuna e Deçanit e ka konsideruar shqetësues aktgjykimin dënues të 16 shtatorit të Gjykatës Speciale në Hagë ndaj ish-krerëve të Ushtrisë Çlirimtare të Kosovës.

Në një mbledhje urgjente të mbajtur në Deçan, përfaqësues të institucioneve komunale dhe të subjekteve politike e cilësuan vendimin si të rëndë dhe shprehën kundërshtimin ndaj tij, duke bërë thirrje për drejtësi për ish-krerët e UÇK-së.

Kryetari i Komunës, Bashkim Ramosaj, tha se zhvillimet pas luftës kanë krijuar një perceptim negativ ndaj UÇK-së, ndërsa shefi i grupit të AAK-së, Florim Mataj, e quajti aktgjykimin “goditje të rëndë dhe tronditje për të gjithë qytetarët”.

Anëtari i PDK-së, Shkumbin Demaliaj, tha se UÇK-ja është “emblema më e ndritur e kombit” dhe bëri thirrje që të mos ndalen kërkesat për drejtësi, ndërsa anëtari i LVV-së, Faton Selmanaj, theksoi se nuk bëhet fjalë vetëm për individë, por për mënyrën se si trajtohet lufta e Kosovës.

Burimi: KosovaPress