Dhunuan kamerierin 18-vjeçar në Golem, “arrest në burg” për dy të arrestuarit

Gjykata e Durrësit ka caktuar masën e sigurisë “arrest në burg”, me afat 45 ditë, për dy personat e akuzuar për dhunimin e një kamerieri 18-vjeçar në Malin e Robit, Golem.

Bëhet fjalë për një prej bashkëpronarëve të hotelit, Florian Habilaj, dhe mikun e tij, E. Dragoti, të cilët u arrestuan nga Policia e Kavajës. Prokuroria i akuzon dy të arrestuarit për veprën penale “plagosje e rëndë me dashje”.

Ngjarja dyshohet se ka nisur pas një konflikti lidhur me pagën e 18-vjeçarit, i cili punonte si kamerier në hotelin e bashkëpronarëve Habilaj.

Ndërkohë, në orën 12:30 pritet të zhvillohet seanca për caktimin e masës së sigurisë ndaj Melson Nelës, xhaxhait të kamerierit 18-vjeçar.

Nela u arrestua pasi u kap në automjet me një kallashnikov dhe tre karikatorë. Sipas Policisë, ai dyshohet se po shkonte për t’u hakmarrë pas dhunës së ushtruar ndaj nipit të tij.

Hetimet për ngjarjen vijojnë për të zbardhur plotësisht rrethanat dhe për të përcaktuar përgjegjësitë e personave të përfshirë.