Donald Trump nuk do jetë në dasmën e të birit këtë fundjavë në Bahamas

Dasma e djalit të presidentit amerikan, Donald Trump Jr., do të mbahet këtë fundjavë në Bahamas, pa praninë e babait të tij, presidentit të Shteteve të Bashkuara të Amerikës, Donald Trump, thanë sot burime të paidentifikuara.

Djali i madh i presidentit amerikan do të martohet me modelen dhe influencuesen Bettina Anderson nga Palm Beach në një ishull të vogël në Bahamas, thanë për CNN dy burime të njohura me planet.

Sipas burimeve, Trump nuk pritet në ceremoninë intime.

Lista e të ftuarve është qëllimisht e kufizuar dhe përfshin vetëm anëtarë të familjes së ngushtë të çiftit dhe miqtë më të ngushtë, më pak se 50 persona në total.

Megjithatë, Trump nuk tha asgjë kur gazetarët në Zyrën Ovale e pyetën dje në lidhje me planet e tij për dasmën.

“Do të doja të vija, por do të jetë një ceremoni e vogël private dhe do të përpiqem ta arrij. Koha nuk është e përshtatshme për mua tani. Ka Iranin dhe gjëra të tjera”, u tha Trump gazetarëve.

Një nga burimet i tha CNN se presidenti amerikan pritej prej kohësh të mos merrte pjesë në dasmë, pjesërisht për shkak të dëshirës së çiftit për ta mbajtur ceremoninë plotësisht private.

Nuk ka asnjë tregues në axhendën publike të Trumpit se ai do të marrë pjesë në këtë ngjarje.

“Është një situatë në të cilën nuk mund të fitoj. Nëse vij, do të kritikohem. Nëse nuk vij, do të kritikohem përsëri”, tha presidenti amerikan, duke aluduar në mbulimin e mundshëm negativ të medias.

Sipas burimeve, Trump Jr. dhe Anderson donin që detajet e dasmës të mos zbuloheshin në media, në mënyrë që ngjarja të mbetej ekskluzive dhe e izoluar nga publiku.

Kjo, tha ajo, do të zvogëlonte rreziqet e sigurisë dhe do t’u lejonte mysafirëve të shmangnin ndërlikimet që shoqërojnë ngjarjet në të cilat merr pjesë presidenti i SHBA-së.

Vëllezërit dhe motrat e Trump pritet të marrin pjesë në dasmë, thanë burimet.

Kjo do të jetë martesa e dytë e Donald Trump Jr.

Ai ishte i martuar më parë me Vanessa Trump për 12 vjet, nga e cila u divorcua në vitin 2018.

Vanessa Trump njoftoi dje se është diagnostikuar me kancer në gji.

Trump Jr. më parë ishte i fejuar me Kimberly Guilfoyle, ambasadoren aktuale të SHBA-së në Greqi dhe ish-gruan e Guvernatorit të Kalifornisë, Gavin Neësom, nga viti 2020 deri në vitin 2024.