Dron rus godet pikë karburanti dhe magazina në Kiev; Polonia ngre në ajër aviacionin ushtarak

Një dron goditi një pikë karburanti në kryeqytetin ukrainas, Kiev, në orët e para të së martës, njoftoi kryebashkiaku Vitali Klitschko, ndërsa një tjetër sulm goditi objektet e magazinës në një pjesë tjetër të qytetit.

Një dron ka goditur një pikë karburanti në kryeqytetin e Ukrainës, Kiev, në orët e para të së martës, bëri të ditur kryebashkiaku Vitali Klitschko në aplikacionin e mesazheve Telegram. Sipas tij, një tjetër sulm goditi objektet e magazinës në një pjesë tjetër të qytetit. Një dëshmitar i agjencisë Reuters tha se dëgjoi një shpërthim në Kiev.

Sulmi vjen pasi presidenti amerikan Donald Trump deklaroi të hënën se Ukraina dhe Rusia kishin rënë dakord të mos godisnin objektet energjetike të njëra-tjetrës. Rusia ka nisur së fundmi të godasë pikat e karburantit në Kiev, duke zgjeruar gamën e objektivave që synon. Në muajt e fundit, Rusia ka goditur rreth 300 pika karburanti, kryesisht në rajonet afër vijës së frontit.

Presidenti ukrainas Volodymyr Zelenskiy deklaroi të hënën se Kievi është gati të mbështesë propozimin amerikan për një armëpushim Ukrainë–Rusi për objektet energjetike, por vetëm nëse Uashingtoni siguron se Moska është vërtet e gatshme t’i japë fund luftës.

Ndërkohë, ndërsa Moska sulmonte Ukrainën, Polonia njoftoi se ka nisur operacione të aviacionit ushtarak si masë parandaluese për të siguruar hapësirën e saj ajrore, sipas një deklarate të Forcave të Armatosura polake në rrjetin social X. Në Rusi, e cila e nisi pushtimin e Ukrainës në vitin 2022, një sulm me raketa ukrainase ka dëmtuar një magazinë të kompanisë së tregtisë online Ozon në qytetin jugor portual Taganrog, bëri të ditur guvernatori rajonal në Telegram. Po ashtu, një sulm me dron ka goditur një objekt industrial në rajonin e Samarës mbi lumin Vollgë, pa e emërtuar objektin guvernatori Vyacheslav Fedorishchev; rajoni është shtëpia e disa rafinerive të mëdha të naftës. Reuters nuk i verifikoi dot menjëherë këto raporte.

Burimi: Reuters