Dwayne Johnson zbulon pengun e madh pas “The Smashing Machine”.

Aktori i njohur Dwayne Johnson ka pranuar se shpresonte të merrte nominimin e tij të parë për çmimin Oscar falë interpretimit në filmin biografik “The Smashing Machine”, por theksoi se mungesa e një nominimi nuk e zbeh krenarinë për këtë projekt.

Në një intervistë për revistën Esquire, aktori foli për përvojën e tij duke interpretuar legjendën e UFC-së, Mark Kerr, në dramën biografike që ka marrë vlerësime të shumta nga kritika.

“Do të kishte qenë e jashtëzakonshme të nominohesha për Oscar. E kuptova shumë shpejt se është një gjë e rrallë të arrish në atë pikë ku edhe diskutohesh për një nominim të tillë,” u shpreh Johnson.

Ai shtoi se do të kishte qenë një arritje e madhe personale, por nuk e konsideron mungesën e nominimit si një dështim.

“Ishte emocionuese. Do të kishte qenë fantastike nëse do të ndodhte, por nuk ndodhi,” tha aktori.

Në filmin “The Smashing Machine”, Johnson rikthehet te rrënjët e tij në sportet luftarake për të portretizuar ish-kampionin e UFC-së, Mark Kerr. Në film luajnë gjithashtu Emily Blunt, në rolin e bashkëshortes së Kerr, Dawn, si dhe Ryan Bader, Bas Rutten dhe Oleksandr Usyk.

Filmi pati premierën e tij në Festivalin e Filmit në Venecia, ku u prit me një ovacion në këmbë prej 15 minutash, duke konfirmuar pritshmëritë e larta që e shoqërojnë këtë produksion.

Pavarësisht se nuk siguroi nominimin e shumëpritur për Oscar, Johnson tha se është i bindur për rëndësinë dhe ndikimin e filmit.

“Nuk kam menduar asnjëherë se kjo nuk kishte rëndësi. Gjithmonë kam besuar se ky film ka rëndësi. Dhe më ka ndezur një zjarr të ri brenda meje për t’u rikthyer në punë dhe për të sfiduar veten edhe më shumë,” deklaroi ai.

Ndërkohë, Emily Blunt ka treguar më herët se roli në “The Smashing Machine” ka qenë transformues për Johnsonin, i cili gjatë karrierës së tij është identifikuar kryesisht me filmat aksion.

“Mendoj se ky film i ka ndryshuar jetën. Ai është një njeri që rrallëherë ka pasur mundësinë të zhduket pas një personazhi dhe të humbasë veten në rol. Ishte emocionuese ta shihja si mikeshë dhe si aktore duke zbuluar potencialin e tij të plotë,” tha Blunt.

“The Smashing Machine” u publikua në tetor 2025 dhe konsiderohet si një nga performancat më të vlerësuara të karrierës së Dwayne Johnson.