El Salvador miraton ligjin që lejon burgim të përjetshëm për të miturit për krime të rënda

Qeveria e El Salvador ka miratuar një ligj të ri që lejon dënimin e të miturve deri në burgim të përjetshëm për krime të rënda, përfshirë vrasjen, terrorizmin dhe përdhunimin, një vendim që ka ngjallur debat të fortë ndërkombëtar.

Ligji u publikua zyrtarisht të martën dhe pritet të hyjë në fuqi më 26 prill. Ai është pjesë e politikave të ashpra të ndërmarra nga presidenti Nayib Bukele për të luftuar dhunën e bandave, një problem që ka dominuar për vite me radhë në vend.

Që nga marsi i vitit 2022, El Salvador ndodhet në gjendje të jashtëzakonshme, e cila ka pezulluar disa liri civile në favor të fuqizimit të policisë dhe ushtrisë. Fillimisht e menduar për 30 ditë, kjo masë është rinovuar vazhdimisht dhe ka çuar në një valë arrestimesh masive.

Sipas të dhënave zyrtare, mbi 90 mijë persona janë burgosur gjatë kësaj periudhe. Organizata si Human Rights Watchvlerësojnë se rreth 1.9 për qind e popullsisë ndodhet aktualisht pas hekurave, një nga normat më të larta në botë.

Në disa raste, të arrestuarit mbahen pa akuza, ndërsa të tjerë janë gjykuar në procese masive, një praktikë e miratuar në vitin 2023 që lejon gjykimin e deri në 900 personave njëkohësisht.

Amendamenti që lejon dënimin me burgim të përjetshëm për të miturit u miratua në mars dhe u mbështet fuqimisht nga partia në pushtet, Nuevas Ideas, e cila kontrollon shumicën dërrmuese të parlamentit.

Presidenti Bukele ka mbrojtur publikisht këtë masë, duke kritikuar kundërshtarët si të butë ndaj krimit të dhunshëm. Megjithatë, organizatat ndërkombëtare kanë shprehur shqetësim të thellë për pasojat e saj.

UNICEF paralajmëroi se dënimet e tilla mund të kenë pasoja të rënda dhe afatgjata në zhvillimin e fëmijëve dhe adoleshentëve, duke theksuar se ato bien në kundërshtim me standardet ndërkombëtare për të drejtat e fëmijëve.

Sipas ekspertëve të Kombeve të Bashkuara, sistemi i drejtësisë për të miturit duhet të fokusohet në rehabilitim dhe riintegrim, jo në ndëshkime ekstreme si burgimi i përjetshëm.

Ndërkohë, raportet e fundit nga grupe ndërkombëtare të ekspertëve kanë ngritur akuza serioze ndaj qeverisë së El Salvadorit për shkelje sistematike të të drejtave të njeriut gjatë zbatimit të masave kundër krimit.

Edhe vetë presidenti Bukele ka pranuar se mijëra persona të arrestuar mund të kenë qenë të pafajshëm, çka ka shtuar më tej shqetësimet për mënyrën se si po zbatohet kjo politikë.

Pavarësisht kritikave, autoritetet në El Salvador mbeten të vendosura për të vazhduar me qasjen e tyre të ashpër, duke argumentuar se ajo ka sjellë rezultate në uljen e kriminalitetit në vend.