Episode në Eksarkia gjatë natës: zjarr në kosha dhe gurë ndaj zjarrfikësve, dy të arrestuar

Episode tensioni u shënuan në orët e para të së dielës në lagjen Eksarkia të Athinës. Siç njofton Kathimerini, duke iu referuar Policisë greke, rreth orës 02:00 një grup prej rreth dhjetë personash i vuri zjarrin dy koshave të mbeturinave në kryqëzimin e rrugëve Benaki dhe Koleti.

Kur zjarrfikësit mbërritën për të shuar flakët, ata u sulmuan me gurë nga personat e mbledhur në vendngjarje, raporton agjencia APE-MPE. Në zonë ndërhyri një skuadër e forcave speciale të policisë, e cila i largoi të rinjtë, ndërsa tensioni vazhdoi për disa kohë në rrugët përreth.

Nga episodet u dëmtuan gjithsej gjashtë kosha mbeturinash. Policia bëri nëntë shoqërime, prej të cilave dy u kthyen në arrestime: një 18-vjeçar dhe një 14-vjeçar.

Të arrestuarit akuzohen për prishje të qetësisë publike, dhunë ndaj punonjësve, dëmtim prone dhe tentativë për lëndim të rrezikshëm trupor, dhe pritet të dalin përpara prokurorit.