Pizza Fan në garë me kohën për rihapjen: qendra e porosive e sekuestruar, 2.500 punonjës në ankth

Zinxhiri i picerive Pizza Fan po bën garë me kohën për të rihapur rrjetin e tij prej rreth 110 dyqanesh në gjithë Greqinë, pasi qendra telefonike e porosive dhe softueri i kompanisë u sekuestruan nga policia financiare si prova kryesore në çështjen e evazionit fiskal prej rreth 35 milionë eurosh, siç njofton Protothema.

Pa qendrën e porosive, dyqanet praktikisht nuk mund të marrin porosi, edhe pse veprimtaria e zinxhirit nuk është pezulluar zyrtarisht dhe asnjë autoritet tatimor nuk ka urdhëruar mbylljen apo vulosjen e kompanisë. Drejtuesit po punojnë pa ndërprerje për rikthimin e sistemit, ndërsa kompania ka njoftuar se synon një rinisje të menjëhershme e të plotë, por pa dhënë një datë konkrete.

Në të njëjtën kohë, pas paraburgimit të drejtuesve të kompanisë, mes tyre themeluesi dhe pronari Kostas Antaras, po zhvillohen bisedime jozyrtare për shitjen e zinxhirit. Sindikata e punonjësve të ushqimit, nga ana e saj, kërkon garantimin e vendeve të punës për rreth 2.500 punonjësit, pagesën e pagave të prapambetura dhe vazhdimin e mbulimit sigurues.

Edhe qarqe të Ministrisë së Punës thonë se përparësi ka vazhdimi i veprimtarisë së kompanisë dhe ruajtja e vendeve të punës, në mënyrë që të mos nevojiten masa mbrojtëse për punonjësit.

Dosja e çështjes përfshin 126 persona, me 23 të arrestuar që përballen me akuza të rënda për organizatë kriminale dhe evazion fiskal, përmes një softueri që lejonte përfundimin e porosive pa lëshuar faturën e ligjshme; sipas hetimit, rreth 20 për qind e faturave nuk lëshoheshin fare.