“Është sport për burra”, trajneri shkarkohet për shkak të një komenti seksist ndaj gjyqtares

Klubi i Major League Soccer, Columbus Crew, ka shkarkuar trajnerin e ekipit rezervë, Federico Higuaín – vëllain e ish-sulmuesit të Napolit, Juventusit dhe Milanit, Gonzalo. Vendimi pason pretendimet për sjellje seksiste të trajnerit ndaj një zyrtareje të ndeshjes gjatë një takimi të fundit në ligën MLS NEXT Pro.

Mediat vendase raportuan se Higuain së fundmi kishte vuajtur një pezullim prej dy ndeshjesh pas një incidenti që përfshinte një gjyqtare femër.

Shoqata e Gjyqtarëve Profesionistë të Futbollit, e cila përfaqëson zyrtarët e ndeshjeve në Shtetet e Bashkuara dhe Kanada, deklaroi në rrjetet sociale se një trajner ishte pezulluar për dy ndeshje pasi i kishte dhënë dorën një gjyqtareje dhe kishte refuzuar ta lëshonte atë, ndërkohë që i thoshte: “Mos harro, ky është një sport për burra.”

“Kemi vendosur se lirimi i Federico Higuaínit nga detyrat e tij është në interesin më të mirë të klubit, lojtarëve dhe stafit teknik,” tha Issa Tall, Drejtori i Përgjithshëm i Crew.

“Pas diskutimeve të zhvilluara këtë javë dhe vlerësimeve të mëtejshme gjatë muajit të kaluar, u bë e qartë se standardet e klubit lidhur me pritshmëritë për një lider që drejton një nga ekipet tona nuk u përmbushën.”