Cakolli: Kush do ta caktojë datën e zgjedhjeve të reja nëse nuk zgjedhet Presidenti?

Eugen Cakolli nga Instituti Demokratik i Kosovës (KDI) ka komentuar aktgjykimin e fundit të Gjykatës Kushtetuese për kërkesat e bashkuara KO256/26 dhe KO258/26, të cilat shqyrtonin kushtetutshmërinë e konstituimit të Kuvendit dhe të zgjedhjes së Qeverisë së re të Kosovës.

Sipas Cakollit, Kushtetuesja ka vendosur një kornizë kohore prej rreth 90 ditësh pas certifikimit të rezultateve zgjedhore nga Komisioni Qendror i Zgjedhjeve (KQZ) për formimin e institucioneve të vendit. Aktgjykimi, sipas tij, e relativizon shkeljen e afatit 30-ditor për konstituimin e Kuvendit, por njëkohësisht e pamundëson zvarritjen e pakontrolluar të formimit të institucioneve, duke përcaktuar si pasojë fillimin e rrjedhjes së afateve të tjera kushtetuese.

Megjithatë, Cakolli thekson se Gjykata nuk ka sqaruar një çështje thelbësore: kush do ta caktojë datën e zgjedhjeve të reja, nëse eventualisht nuk arrihet të zgjidhet me sukses Presidenti i ri i vendit. Afati 60-ditor për zgjedhjen e Presidentit, kujton ai, nisi më 8 gusht 2026 dhe përfundon më 6 tetor 2026 — pra, vetëm dy javë nga sot.

“Kush do ta caktojë 8 ose 15 nëntorin si datë të zgjedhjeve të reja, nëse eventualisht nuk arrihet të zgjidhet suksesshëm Presidenti?” — është pyetja që shtron Cakolli, duke vënë në dukje se aktgjykimi e lë të hapur këtë pikë kyçe.

Burimi: Klan Kosova