Vuçiç njofton mitingun e parë parazgjedhor të SNS-së më 3 tetor në Beograd

Beograd – Presidenti i Serbisë Aleksandar Vuçiç ka njoftuar se mitingu i parë i madh parazgjedhor i Partisë Progresive Serbe (SNS) do të mbahet më 3 tetor në Beograd. Njoftimin kreu i shtetit serb e bëri përmes një postimi në rrjetin social Instagram.

Në të njëjtin njoftim, Vuçiç zbuloi edhe planin e mitingjeve të radhës: pas kryeqytetit, tubime do të mbahen në Novi Sad dhe në Kragujevc, ndërsa mitingu përmbyllës i fushatës do të organizohet në Nish. “Sepse dua t’i mundim bindshëm në jug dhe juglindje të Serbisë”, u shpreh ai, sipas portalit serb Nova.rs.

Presidenti theksoi se po lufton “për ju, për ne, për Serbinë”, deklaratë të cilën e bëri nga Nju-Jorku, ku ndodhet aktualisht.

Kujtojmë se në fillim të shtatorit Vuçiç anuloi mitingun e SNS-së të planifikuar për 4 shtator në Novi Sad, me arsyetimin e sigurisë. Mitingun në këtë qytet ai e ka njoftuar dhe shtyrë disa herë që nga tragjedia e rënies së strehës në stacionin hekurudhor të Novi Sadit, ku humbën jetën 16 qytetarë.

Burimi: Nova.rs