Fitimi i Goldman Sachs rritet në tremujorin e tretë, të ardhurat nga aksionet kërcejnë 72%

Goldman Sachs njoftoi të martën një fitim më të lartë për tremujorin e tretë, i mbështetur nga një fluks i qëndrueshëm marrëveshjesh dhe nga tregjet e trazuara prej konfliktit në Lindjen e Mesme, që nxitën aktivitetin në tregtimin e aksioneve, siç njofton Reuters.

Fitimi total i bankës arriti në 5.29 miliardë dollarë, ose 17.01 dollarë për aksion, për periudhën tremujore që përfundoi më 30 shtator. Një vit më parë, në të njëjtin tremujor, banka kishte raportuar 4.10 miliardë dollarë fitim, ose 12.25 dollarë për aksion.

Rritjen e udhëhoqi tregtimi i aksioneve, të ardhurat prej të cilit u ngjitën me 72 për qind dhe arritën në 6.44 miliardë dollarë. Në kahun tjetër, të ardhurat nga instrumentet me të ardhura fikse, valutat dhe lëndët e para, të njohura shkurt si FICC, shënuan një rënie të lehtë prej 1 për qind, në 3.47 miliardë dollarë.

Edhe bankingu i investimeve pati një tremujor më të mirë: tarifat nga kjo veprimtari u rritën me 21 për qind, në 3.22 miliardë dollarë. Divizioni i menaxhimit të aseteve dhe pasurisë u zgjerua me 14 për qind, ndërsa të ardhurat totale të grupit u rritën me 23 për qind, duke arritur në 18.68 miliardë dollarë.

Aksionet e bankës u rritën me rreth 1.5 për qind në tregtimin para hapjes së bursës. Drejtori ekzekutiv David Solomon vlerësoi se, sipas Reuters, banka mbetet e pozicionuar mirë për t’u shërbyer klientëve të saj, pavarësisht pasigurive që vazhdojnë në ekonominë globale.