Waller i Fed-it: Pritjet e inflacionit janë të ankoruara mirë, rendimentet rriten nga rritja reale

Rritja e fundit e rendimenteve të bonove amerikane pasqyron një ekonomi reale më të fortë dhe jo pritje më të larta për inflacionin, i cili mbetet i ankoruar mirë. Kështu u shpreh të martën guvernatori i Rezervës Federale, Christopher Waller, gjatë një aktiviteti të Bloomberg në Mumbai, siç njofton Reuters.

Deklarata vjen në ditët kur rendimentet e bonove 10-vjeçare kanë arritur nivelet më të larta në 24 vjet. Një pjesë e analistëve e kanë lidhur këtë lëvizje me shqetësimet se lufta mund të ushqejë inflacionin, me borxhin publik në rritje dhe me investimet e mëdha që po derdhen në inteligjencën artificiale.

Waller iu referua edhe kërkimeve sipas të cilave borxhi i qeverisë amerikane, gjatë dy viteve të fundit, ka humbur një pjesë të statusit të tij si aktiv strehë e sigurt në nivel global. Sipas këtij vlerësimi, vetëm ky ndryshim mund t’u ketë shtuar rendimenteve rreth 50 deri në 70 pikë bazë.

Sa i përket inteligjencës artificiale, ai vlerësoi se investimet në këtë fushë, përfshirë ndërtimin e qendrave të të dhënave, do ta mbështesin kërkesën edhe për dy apo tri vjet të tjera. Përfitimet në produktivitet, sipas tij, janë ende disa vjet larg.

Guvernatori e minimizoi gjithashtu rolin e politikës së Fed-it në kostot afatgjata të huamarrjes. Banka qendrore amerikane i rriti normat e interesit muajin e kaluar dhe, sipas Reuters, Waller ka lënë së fundmi të hapur mundësinë edhe për rritje të mëtejshme.