FOKUS – EBA: Incidenti në avionin e ”Flydubai”-t një akt terrorist

KAJRO, 3 tetor /ATSH-DPA/ – Bashkëpiloti i një avioni të ”Flydubai”-t sulmoi kapitenin me një sëpatë emergjence dhe tentoi të merrte kontrollin e avionit, njoftoi sot agjencia shtetërore e lajmeve të Emirateve të Bashkuara Arabe (WAM), duke cituar Prokurorinë Publike të Emirateve.

Sipas raportit, autoritetet e Emirateve të Bashkuara Arabe besojnë se incidenti i së mërkurës ishte një përpjekje për sulm terrorist.

Edhe qeveria izraelite e kishte cilësuar më herët incidentin si përpjekje për sulm terrorist, ndërsa kryeministri izraelit Benjamin Netanyahu tha se bashkëpiloti ishte indoktrinuar me ideologji islamike.

Hetimet nga autoritetet emiratase vijojnë për incidentin në fluturimin drejt Izraelit, ndërsa hetuesit po përpiqen të përcaktojnë motivin e bashkëpilotit dhe nëse ai kishte lidhje me persona ose organizata të tjera.

Avioni i kompanisë me bazë në Emiratet e Bashkuara Arabe, ”Flydubai” po fluturonte nga Dubai drejt Tel Avivit të mërkurën kur ndodhi sulmi, duke bërë që avioni të humbiste ndjeshëm lartësi.

Piloti, shtetas indian, pësoi plagë të rënda, por arriti të hapte derën e kabinës, duke u mundësuar pasagjerëve dhe pjesëtarëve të ekuipazhit ta neutralizonin sulmuesin dhe të stabilizonin avionin.

Avioni kreu një ulje emergjente në Tabuk të Arabisë Saudite.

Bashkëpiloti, për të cilin burime izraelite thonë se është nga Omani, u dërgua në Emiratet e Bashkuara Arabe.

Sipas një raporti të “Wall Street Journal”, duke cituar persona të njohur me çështjen, autoritetet e Omanit e kishin ndaluar më parë bashkëpilotit të fluturonte për shkak të shqetësimeve se ai kishte përqafuar qëndrime ideologjike radikale.

Edhe televizioni saudit “Al Arabiya”, duke cituar burimet e veta, raportoi se ai ishte ndaluar të fluturonte nga autoritetet omaneze dhe se dyshohet se ishte ndikuar nga ide ekstremiste gjatë qëndrimeve të mëparshme në Siri. /Ad.Ab./ a.jor.