Millosh Jovanoviç në Pirot: “Në pushtet s’do t’i detyrojmë njerëzit të shkojnë në mitinge si bagëti”

Siç njofton gazeta serbe Danas, duke cituar deklaratën e Novi DSS-së, bartësi i listës “Autentična desnica – dr Millosh Jovanoviç” premtoi sot në një tribunë në Pirot se koalicioni i tij, sapo të marrë pushtetin dhe përgjegjësinë për drejtimin e vendit, “nuk do ta shantazhojë kurrë askënd për votë dhe nuk do t’i detyrojë njerëzit të shkojnë në mitingjet e tij si bagëti”.

“Presionet dhe shantazhet e tanishme janë të paligjshme”, tha Jovanoviçi, duke shtuar se koalicioni i formuar nga Novi DSS dhe Monarkistët “nuk do ta nënvlerësojë kurrë qytetarin e Serbisë dhe do të luftojë kundër partitokracisë”.

“Kështu sillen dahijtë, por dahijtë janë turq, jo serbë. Ne jemi serbë që duan të nxjerrin më të mirën nga ky popull duke dhënë të parët shembullin e ndershmërisë”, tha Jovanoviçi në Pirot, siç citohet në deklaratën e partisë së tij.

Ai theksoi se funksionarët e listës “Autentična desnica” do të sillen “me dinjitet, ndershmëri, drejtësi, në mënyrë kombëtare, atdhetare dhe demokratike”. Deklaratat vijnë 22 ditë para zgjedhjeve të parakohshme parlamentare të 25 tetorit, në të cilat lista e tij garon kundër pushtetit të SNS-së dhe Listës Studentore.