FOKUS – Erdogan kërkon nē OKB masa ndërkombëtare kundër Izraelit

NJU JORK, 21 shtator /ATSH-ANSA/ – Çështja e Gazës pritet të jetë në qendër të fjalimit të presidentit turk, Recep Tayyip Erdogan, në Asamblenë e Përgjithshme të Kombeve të Bashkuara, ku ai pritet të kërkojë masa ndërkombëtare ndaj Izraelit dhe njohjen e shtetit palestinez.

Sipas agjencisë turke të lajmeve Anadolu, Erdogan pritet të tërheqë vëmendjen e komunitetit ndërkombëtar mbi situatën e rëndë humanitare në Gaza dhe t’u bëjë thirrje vendeve anëtare të OKB-së të marrin qëndrim lidhur me sulmet e vazhdueshme izraelite ndaj popullit palestinez dhe vendeve të tjera të rajonit.

Presidenti turk pritet gjithashtu të kërkojë “masa ndërkombëtare kundër Izraelit”, ndërsa njohja e shtetit palestinez pritet të jetë një tjetër pikë e rëndësishme e mesazhit të tij në Nju Jork.

Erdogan mbërriti një ditë më parë në Nju Jork, i shoqëruar nga një delegacion i nivelit të lartë. Në të bëjnë pjesë ministri i Jashtëm Hakan Fidan, ministri i Ekonomisë Mehmet Simsek, ministri i Drejtësisë Akin Gurlek dhe kreu i shërbimeve të inteligjencës, Ibrahim Kalin.

Fjalimi i presidentit turk zhvillohet në kuadër të punimeve të Asamblesë së Përgjithshme të OKB-së, në një kohë kur situata në Gaza dhe lufta në Lindjen e Mesme mbeten ndër çështjet kryesore në agjendën ndërkombëtare.