FOKUS – Nafta rritet pas paralajmërimit të Trumpit për një luftë ekonomike ndaj Iranit

LONDËR, 20 gusht /ATSH-AFP/ – Çmimet e naftës u rritën sot, pasi tregjet reaguan ndaj kërcënimeve të reja të presidentit amerikan Donald Trump, i cili premtoi një luftë ekonomike dhe izolim të Iranit në një shkallë të paprecedentë.

Çmimi i naftës “Brent” u rrit me 2,46%, në 93,87 dollarë për fuçi, ndërsa nafta amerikane “West Texas Intermediate” (WTI) fitoi 2,12%, duke arritur në 87,65 dollarë për fuçi.

Rritja e çmimeve lidhet me shqetësimet e tregjeve se masat e reja amerikane kundër Iranit mund të ndikojnë më tej në furnizimin global me naftë, veçanërisht në një kohë kur tensionet në Lindjen e Mesme mbeten të larta.

Presidenti Trump njoftoi një fushatë të re ekonomike kundër Iranit, të cilën e përshkroi si operacionin ekonomik “më shkatërrues” të ndërmarrë ndonjëherë kundër një vendi.

Ai paralajmëroi gjithashtu pasoja të rënda ekonomike për shtetet, kompanitë dhe institucionet financiare që vazhdojnë të kenë marrëdhënie ekonomike me Teheranin.

Presidenti amerikan kërkoi ndërprerjen e asaj që ai e cilësoi si kontrabandë të naftës iraniane, transfertat financiare, përdorimin e kompanive guackë dhe mekanizmave të tjerë që i mundësojnë Iranit të vazhdojë të gjenerojë të ardhura nga nafta.

Tregjet e energjisë po ndjekin me vëmendje zhvillimet, pasi çdo kufizim i mëtejshëm ndaj eksporteve iraniane mund të shtojë presionin mbi furnizimin global dhe të mbajë çmimet e naftës në nivele të larta. /Ad.Ab./ a.jor.