FOKUS – Sulmet e rebelëve Houthi shtojnë shqetësimet për marrëveshjen bërthamore mes Trumpit dhe Arabisë Saudite
SANA’A 21 nëntor /ATSH/ – Sulmet e Huthëve ndaj infrastrukturës saudite po shtojnë shqetësimet në lidhje me marrëveshjen e propozuar nga presidenti amerikan Donald Trump për bashkëpunimin bërthamor me Arabinë Saudite, sipas Reuters.
Kjo ndodh vetëm pak javë përpara se senatorët amerikanë të votojnë nëse duhet ta bllokojnë marrëveshjen.
Rebelët Houthi në Jemen, të cilët mbështeten nga Irani, kanë intensifikuar sulmet me dronë dhe raketa ndaj aeroporteve, objekteve të naftës dhe ndërtesave të zyrave në Arabinë Saudite.
Kjo ka ngritur pikëpyetje mbi aftësinë e Riadit për të garantuar sigurinë e centraleve bërthamore që parashikohet të ndërtohen në kuadër të marrëveshjes.
Senati amerikan pritet të votojë për këtë çështje që në javën e 30 nëntorit, sipas ndihmësve të senatorëve republikanë dhe demokratë, të cilët kanë njohuri mbi kalendarin e votimit.
Presidenti Trump, i cili befasoi anëtarët e Kongresit në korrik duke njoftuar marrëveshjen, ia paraqiti atë Kongresit në gusht. Marrëveshja njihet si Marrëveshja 123, një kuadër ligjor amerikan që rregullon bashkëpunimin bërthamor me vendet e tjera.
Shqetësimet për marrëveshjen janë shtuar pasi ajo nuk trajton çështjen nëse Arabia Saudite do t’u bashkohet Marrëveshjeve të Abrahamit për normalizimin e marrëdhënieve me Izraelin.
Gjithashtu, ajo nuk kërkon masa të rrepta kontrolli, si inspektimet e papritura në centralet e propozuara.
Deri më tani, shqetësimet kryesore lidhur me marrëveshjen kanë qenë të përqendruara te mundësia që Arabia Saudite të zhvillojë një armë bërthamore në të ardhmen.
Por fushata e sulmeve të Houthëve ka shtuar frikën se militantët mund të godasin ose edhe të marrin nën kontroll objektet bërthamore.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.