FOKUS – Zelensky takon Witkoff në Oslo mes tensioneve në rritje Ukrainë-SHBA

KIEV, 20 tetor /ATSH-Ukrinform/- Presidenti ukrainas, Volodymyr Zelensky pritet të takohet sot në Oslo me të dërguarin amerikan Steve Witkoff, në kuadër të përpjekjeve diplomatike për të gjetur një mënyrë për t’i dhënë fund luftës së Rusisë kundër Ukrainës.

Jared Kushner, dhëndri i presidentit amerikan Donald Trump dhe një nga personat kryesorë të Shtëpisë së Bardhë në përpjekjet për zgjidhjen e konflikteve ndërkombëtare, pritet të marrë pjesë në takim përmes një lidhjeje me video.

Në bisedime do të marrin pjesë gjithashtu kryeministri norvegjez, Jonas Gahr Store dhe presidenti finlandez, Alexander Stubb.

“Qëllimi është që përpjekjet diplomatike të rifillojnë në një drejtim më konstruktiv”, deklaroi Store, sipas agjencisë norvegjeze të lajmeve NTB.

Takimi zhvillohet në një kohë kur Trump po kritikon gjithnjë e më ashpër Ukrainën.

Së fundmi, ai i cilësoi si “turp” sulmet ukrainase me rreze të gjatë veprimi ndaj infrastrukturës ruse të naftës, duke i fajësuar ato për çmimet e larta të energjisë në SHBA.

Kjo çështje po ndikon në perspektivat elektorale të partisë së tij konservatore përpara zgjedhjeve të rëndësishme për Kongresin amerikan, që do të mbahen muajin e ardhshëm.

Zelensky ka shprehur ditët e fundit pakënaqësinë e tij për kufizimet që prekin shërbimin satelitor të internetit “Starlink”, në pronësi të kompanisë së Elon Musk, të cilin ushtria ukrainase e përdor për operacionet në vijën e frontit.

Ai ka shprehur gjithashtu shqetësim për vonesat në dërgimin e raketave amerikane.

Media amerikane “Axios” raportoi dje se sekretari amerikan i Mbrojtjes, Pete Hegseth, nuk kishte autorizuar dërgesat e raketave amerikane “Patriot” dhe të raketave të tjera për mbrojtjen ajrore, edhe pse ato ishin paguar tashmë nga vendet anëtare të NATO-s. Pentagoni e kundërshtoi këtë raportim.

Në një postim të publikuar sot në mëngjes në rrjetin social X, Zelensky tha se kishte zhvilluar një bisedë të rëndësishme me sekretarin amerikan të Shtetit, Marco Rubio.

Sipas Zelensky, gjatë bisedës u diskutua për nevojën e raketave që mund të interceptojnë dhe shkatërrojnë raketat balistike, paralajmërimin në kohë të sulmeve raketore ruse, rikthimin e shërbimit satelitor “Starlink”, si dhe për përpjekjet diplomatike për t’i dhënë fund luftës.

“Jam mirënjohës për gatishmërinë e tij për të ndihmuar dhe për qëndrimin e tij të qartë”, shkroi Zelensky. /