FOKUS – Zgjedhjet ndezin tensionet në Kashmirin e kontrolluar nga Pakistani, arrestohen mbi 1000 persona

ISLAMABAD, 27 korrik /ATSH-DPA/- Faza e parë e zgjedhjeve në rajonin e Kashmirit të administruar nga Pakistani nisi sot, pas disa javësh protestash që kanë shkaktuar dhjetëra viktima.

Autoriteti lokal zgjedhor njoftoi se votuesit po drejtoheshin drejt qendrave të votimit në qarkun Mirpur, ndërsa zonat e tjera pritet të votojnë në fillim të gushtit.

Zgjedhjet në rajonin Azad Jammu dhe Kashmir, i cili kontrollohet nga Pakistani, kanë shkaktuar protesta të mëdha, të udhëhequra nga organizata Komiteti i Përbashkët i Veprimit Popullor (JAAC), e cila kërkon ndryshimin e ligjeve zgjedhore.

JAAC pretendon se më shumë se 40 protestues, kanë humbur jetën dhe të paktën 1000 persona janë arrestuar gjatë përplasjeve me forcat e sigurisë.

Një zëdhënës i policisë tha se gjashtë pjesëtarë të forcave të sigurisë janë vrarë.

Pakistani dhe India, të dyja vende me armë bërthamore, pretendojnë sovranitetin mbi të gjithë rajonin e Kashmirit dhe kanë zhvilluar tre luftëra për kontrollin e tij.

Përplasja e fundit lidhet me vendet e rezervuara në parlamentin lokal për refugjatët nga Kashmiri indian, që jetojnë në zonat nën administrimin e Pakistanit.

JAAC argumenton se këto vende i japin qeverisë qendrore në Islamabad shumë ndikim, për të ndërhyrë në çështjet lokale.

Qyteti Rawalakot është bërë qendra kryesore e protestave. Shkollat, tregjet dhe bankat janë mbyllur, ndërsa shërbimet e telefonisë celulare dhe internetit janë pezulluar.

Banorët janë gjendur mes protestuesve dhe forcave të sigurisë, të cilët kanë ngritur pika të ndara kontrolli, duke kufizuar lëvizjen e njerëzve dhe mallrave. /