FRANCË – 3,9 tonë kokainë me vlerë 225 milionë euro sekuestrohen në Dunkirk

HAGË/PARIS, 11 shtator /ATSH-DPA/ – Autoritetet franceze dhe holandeze kanë parandaluar futjen në Holandë të 3,9 tonëve kokainë, me një vlerë të përllogaritur prej rreth 225 milionë eurosh.

Droga u zbulua nga doganat franceze në portin e Dunkirkut, gjatë kontrollit të një kontejneri me mbetje plastike që vinte nga Gana.

Kontejneri ishte planifikuar të transportohej më tej drejt portit belg të Anversës.

Operacioni ishte rezultat i një hetimi të përbashkët franko-holandez.

Autoritetet holandeze arrestuan në qytetin e Dordrehtit një person që dyshohet se do të merrej me futjen e kokainës në Holandë.

Hetuesit dyshojnë se një pjesë e ngarkesës ishte destinuar për rrjetin kriminal të holandezit Jos Leijdekkers, një prej figurave të kërkuara të trafikut ndërkombëtar të drogës.

Ai njihet me nofkën “Bolle Jos” dhe prej vitesh është në arrati.

Leijdekkers ndodhet në listën “e më të kërkuarëve” të Europol-it.

Sipas njoftimeve, ai është parë për herë të fundit në Sierra Leone, ndërsa autoritetet holandeze kanë kërkuar ekstradimin e tij.

Sierra Leone nuk po bashkëpunon me kërkesën e Holandës për ekstradim.

Autoritetet holandeze kanë intensifikuar luftën kundër trafikut të kokainës nga Afrika Perëndimore dhe e konsiderojnë Leijdekkers një figurë kyçe jo vetëm në organizimin e dërgesave të drogës, por edhe në nxitjen e përplasjeve të dhunshme mes grupeve kriminale.

Sekuestrimi i fundit vjen pas një tjetër operacioni të madhe në maj, kur marina spanjolle, në bashkëpunim me policinë holandeze, konfiskoi 30 tonë kokainë në brigjet e Afrikës Perëndimore.