Gjenerata Z i kthen shpinën alkoolit, industria humbet 830 miliardë dollarë në katër vjet

– Industria globale e alkoolit po përballet me një ndryshim të madh në zakonet e konsumatorëve, ndërsa Gjenerata Z po tregon gjithnjë e më pak interes për pijet alkoolike.

Sipas të dhënave të “Bloomberg”, të cilat ndjekin rreth 50 nga prodhuesit më të mëdhenj në botë të birrës, verës dhe pijeve alkoolike, vlera e tregut të këtyre kompanive ka rënë me rreth 830 miliardë dollarë gjatë katër viteve të fundit.

Kjo përfaqëson një rënie prej rreth 46% krahasuar me kulmin e qershorit 2021.

Rënia nuk nënkupton se industria ka humbur drejtpërdrejt 830 miliardë dollarë në të ardhura, por se vlera e kompanive të listuara në bursë është tkurrur në këtë përmasë.

Një nga faktorët që po ndryshon tregun është Gjenerata Z, e cila po tregon më shumë interes për shëndetin, mirëqenien dhe pijet pa alkool.

Megjithatë, ekspertët theksojnë se ndryshimi nuk lidhet vetëm me këtë brez, edhe konsumatorët e moshave të tjera po raportojnë konsum më të ulët.

Në SHBA, të dhënat e kompanisë amerikane “Gallup” tregojnë se vetëm 54% e të rriturve deklaruan në vitin 2025 se konsumojnë alkool, niveli më i ulët i regjistruar që nga fillimi i matjeve në vitin 1939.

Për krahasim, kjo shifër ishte 62% në vitin 2023 dhe 58% në vitin 2024.

Ndryshimi lidhet gjithashtu me perceptimin për shëndetin.

Për herë të parë në sondazhet e “Gallup”, 53% e amerikanëve thanë se edhe konsumimi i moderuar i alkoolit, një ose dy pije në ditë, është i dëmshëm për shëndetin.

Në vitin 2018, këtë mendim e kishte vetëm 28% e të anketuarve.

Ndërkohë, edhe ata që vazhdojnë të konsumojnë alkool po raportojnë konsum më të rrallë.

Vetëm 24% e konsumatorëve të alkoolit thanë se kishin pirë një pije gjatë 24 orëve të fundit, niveli më i ulët i regjistruar nga “Gallup”.

Përballë këtij ndryshimi, kompanitë e mëdha të industrisë po përpiqen të përshtaten duke zgjeruar ofertën e birrave, verërave dhe pijeve të tjera pa alkool.

Kompanitë si “Diageo”, “Carlsberg” dhe “Campari” kanë investuar në këtë kategori, duke synuar konsumatorët që duan të ruajnë aspektin social të një pijeje, por pa konsumuar alkool.

Kështu, industria e alkoolit po përballet me një ndryshim të rëndësishëm kulturor, pija pa alkool nuk po shihet më thjesht si alternativë për ata që nuk mund të konsumojnë alkool, por gjithnjë e më shumë si një zgjedhje e vetëdijshme e konsumatorëve.

Të dhënat e “Gallup” sugjerojnë se ndryshimi është më i gjerë se një trend i përkohshëm i Gjeneratës Z, pasi shqetësimet për ndikimin e alkoolit në shëndet, janë rritur në të gjithë popullsinë amerikane. /