“Gjërat janë përkeqësuar”, Kendall Jenner flet për presionin e famës

Kendall Jenner ka folur hapur për mënyrën se si kritikat e vazhdueshme dhe fenomeni i “cancel culture” kanë ndryshuar qasjen e familjes Kardashian-Jenner ndaj reality show-t.

Modelja 30-vjeçare u shpreh për këtë çështje në episodin më të fundit të “The Kardashians”, të transmetuar më 29 tetor, ku reflektoi mbi ndryshimet që kanë ndodhur që nga koha kur familja nisi të shfaqte jetën e saj në televizion.

Sipas Kendall, në fillimet e “Keeping Up with the Kardashians”, gjithçka ishte më spontane dhe familjarët ndiheshin më të lirë të tregonin jetën e tyre para kamerave.

“Cancel Culture luan padyshim një rol në disa gjëra. Mund të rikthehesh dhe të shohësh episodet e vjetra të emisionit tonë dhe mendoj se atëherë gjithçka ishte pak më e lirshme”, u shpreh ajo.

Megjithatë, vitet e vëmendjes së vazhdueshme publike dhe interpretimet e gabuara të ngjarjeve kanë bërë që ajo dhe motrat e saj, Kourtney, Kim, Khloé dhe Kylie, të jenë më të kujdesshme për atë që ndajnë me publikun.

“Pas vitesh të tëra kritikash dhe narrativash të rreme, është e natyrshme që ti ose njëra prej motrave të mia të bëheni më të rezervuara. Gjërat janë përkeqësuar padyshim”, tha modelja.

Ajo shtoi se, në këto kushte, ndoshta mënyra më e sigurt për t’u përballur me reagimet e publikut është të mos u kushtosh aq shumë rëndësi atyre.

Komentet e Kendall erdhën pas një bisede me Scott Disick, me të cilin ajo kujtoi disa nga momentet më të bujshme të “Keeping Up with the Kardashians”.

Mes tyre ishte edhe një episod i vitit 2010, kur Scott, pasi kishte konsumuar alkool, i futi para në gojë një kamarieri gjatë një darke, pasi Kris Jenner i kishte ndërprerë pijet.

Kendall e përshkroi skenën si ikonike, por jo në kuptimin pozitiv të fjalës. Edhe Scott e pranoi se sjellja e tij në atë moment ishte e tmerrshme.

“Disa prej atyre momenteve janë vërtet shumë qesharake. Ka plot skena të bukura me Rob-in dhe Scott-in”, tha Kendall, ndërsa Scott u shpreh i habitur nga mënyra se si silleshin në atë periudhë.

Familja Kardashian-Jenner nisi të dokumentonte jetën e saj në televizion në vitin 2007, kur Kendall ishte vetëm 11 vjeçe dhe Kylie vetëm 8 vjeçe.

Nëna e tyre, Kris Jenner, e kishte parë fillimisht emisionin si një mundësi për të promovuar bizneset e familjes në Calabasas dhe për të krijuar mundësi të reja profesionale.

“Keeping Up with the Kardashians” përfundoi në vitin 2021, pas 20 sezonesh, ndërsa një vit më vonë familja u rikthye me formatin e ri “The Kardashians”, ku vazhdon të ndajë pjesë nga jeta e saj me publikun.