GJERMANI – Merz: Fitorja e AfD-së në Saksoni-Anhalt do të shkaktonte dëme të mëdha

BERLIN, 31 gusht /ATSH-DPA/ – Një fitore për Alternativën e ekstremit të djathtë për Gjermaninë (AfD) në Saksoni-Anhalt do t’i shkaktonte shtetit lindor dëme serioze, tha kancelari Friedrich Merz, një javë para se votuesit të shkonin në qendrat e votimit në ato që mund të jenë zgjedhje historike.

”Saksonia-Anhalt do të vuante probleme të konsiderueshme nëse AfD merr pushtetin”, tha Merz, duke paralajmëruar se investitorët ndërkombëtarë nuk do të kishin gjasa të hapnin vende të reja në një shtet të udhëhequr nga e djathta ekstreme.

“Ky është një vendim që votuesit në Saksoni-Anhalt duhet ta marrin. Vendi do të pësojë dëme të konsiderueshme nëse gjërat shkojnë ashtu siç kemi frikë tani se mund të ndodhin”, theksoi ai.

AfD nuk ka marrë kurrë pjesë në një koalicion qeverisës në 16 landet e Gjermanisë ose në qeverinë e saj federale, pasi të gjitha partitë e tjera kryesore refuzojnë të bashkëpunojnë me të, një politikë e njohur si “muri mbrojtës”.

Pavarësisht se dega e partisë në Saksoni-Anhalt është cilësuar si një rast i konfirmuar i ekstremizmit të krahut të djathtë nga shërbimi sekret vendas, ajo ka një shans serioz për të siguruar një shumicë të plotë në zgjedhjet e 6 shtatorit, pasi ka arritur rregullisht mbi 40% në sondazhe./ a.jor.