Gjini: Ish-krerët e UÇK-së u dënuan më rëndë se ata që mbushën frigoriferat me trupa

Kryetari i Aleancës për Ardhmërinë e Kosovës (AAK), Ardian Gjini, ka reaguar ashpër ndaj aktgjykimit të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës. I ftuar në emisionin “Pressing” në T7, Gjini u shpreh se nuk mund të mbetet indiferent ndaj faktit që 27 vjet pas luftës, një gjykatë shqipton dënime të tilla.

“A mundet me u pajtu dikush që ish-krerët e UÇK-së, me u dënu ma shumë se ata që i kanë mbush frigoriferat me trupa të djemve e çikave tona?”, ka deklaruar Gjini, duke krahasuar dënimet e ish-krerëve të UÇK-së me ato të kriminelëve serbë të luftës.

Sipas tij, aktgjykimi i Hagës përbën një padrejtësi historike ndaj atyre që udhëhoqën luftën çlirimtare të Kosovës, ndërsa ata që kryen krime ndaj popullatës civile shqiptare janë dënuar më lehtë.

Deklarata e Gjinit vjen në një kohë kur aktgjykimi i Gjykatës Speciale ndaj ish-krerëve të UÇK-së ka nxitur reagime të shumta në Kosovë, me liderë politikë dhe figura publike që e kanë cilësuar atë si të padrejtë dhe politik.

Burimi: Gazeta Express