Gjykatësi federal rrëzon padinë e administratës Trump që kërkonte të dhënat e pranimeve të Harvardit

Një gjykatës federal në Boston rrëzoi të hënën padinë e Departamentit të Drejtësisë që kërkonte të detyronte Universitetin e Harvardit të dorëzonte të dhënat e pranimeve, në kuadër të hetimit nëse universiteti vazhdon të marrë parasysh racën në përzgjedhjen e studentëve.

Siç njofton Reuters, gjykatësi i distriktit Myong Joun rrëzoi padinë e administratës së presidentit Donald Trump, të cilën Harvardi e quan pjesë të një fushate më të gjerë të administratës kundër universitetit prestigjioz, ndërsa administrata përpiqet ta përdorë fuqinë federale për të detyruar ndryshime në universitetet që Trump i quan të dominuara nga ideologji të “majta radikale”.

Joun theksoi se vendimi i tij mbështetet në arsye të ngushta procedurale dhe nuk zgjidh nëse Departamenti i Drejtësisë dhe Departamenti i Arsimit mund të kërkojnë përfundimisht të dhënat e mijëra nxënësve të shkollave të mesme që kanë aplikuar në Harvard. Sipas tij, Departamenti i Drejtësisë paditi pa i kryer të gjitha hapat e kërkuara ligjërisht për të siguruar bashkëpunimin vullnetar të universitetit: “Ankesa nuk pretendon se Departamenti i Drejtësisë e informoi Harvardin për veprimin që do të ndërmerrte — pra padinë — nëse universiteti nuk do të bashkëpunonte, dhe as nuk pretendon dështimin konkret të identifikuar”, shkroi gjykatësi, i emëruar nga presidenti demokrat Joe Biden.

Vendimi nuk zgjidh as nëse Harvardi ka diskriminuar dhe, sipas gjykatësit, Departamenti i Drejtësisë mund ta riprovojë një çështje të ngjashme nëse kryen hapat shtesë administrativë. Departamenti i Drejtësisë dhe Harvardi nuk iu përgjigjën menjëherë kërkesave për koment.

Departamenti i Drejtësisë e depozitoi çështjen para gjykatësit Joun në shkurt, duke pretenduar se Harvardi nuk po bashkëpunon me hetimet nëse po zbaton vendimin e Gjykatës Supreme të vitit 2023, që rrëzoi programet e pranimit me bazë race për rritjen e regjistrimit të studentëve nga pakicat. Administrata thotë se i duhen vite të dhënash pranimesh në nivel aplikanti për të përcaktuar nëse raca mbetet faktor në vendimet e Harvardit dhe nëse universiteti po zbaton Titullin VI të Aktit për të Drejtat Civile të vitit 1964, që ndalon diskriminimin racor në programet arsimore.

Avokatët e universitetit kundërshtojnë se padia u depozitua si hakmarrje ndaj Harvardit, sepse refuzoi kërkesat për të ndryshuar qeverisjen, punësimet dhe programet akademike sipas agjendës së administratës. Sipas tyre, padia erdhi pasi Trump njoftoi në fillim të shkurtit se po mbyllte bisedimet për marrëveshje dhe kërkonte 1 miliard dollarë dëmshpërblim nga Harvardi, për të cilin tha se “për një kohë të gjatë është sjellë shumë keq”.

Universiteti në Kembrixh, Masaçusets, ka fituar ndërkohë vendime të tjera gjyqësore që kanë rrëzuar përpjekjet e administratës për t’i ndërprerë mbi 2 miliardë dollarë grante, për ta penguar të presë studentë ndërkombëtarë dhe për ta paditur me pretendimin se nuk i ka mbrojtur studentët hebrenj dhe izraelitë nga ngacmimet.