Gjyqi ndaj Izet Haxhisë, thirret në prokurori Sali Berisha dhe Ylli Rakipi

Prokuroria ka kërkuar thirrjen e 10 dëshmitarëve, për të hedhur dritë mbi vrasjen e Azem Hajdarit.  Në mesin e tyre është edhe ish-kryeministri Sali Berisha, Ylli Rakipi dhe Jaho Mulosmani të cilët janë thërritur për të dëshmuar lidhur me autorin e dyshuar Izet Haxhinë, shkruan portali Albeu.

Ndërkohë në seancën e radhës, mbrojtja e Izet Haxhisë pritet të paraqesë kërkesë në gjykatë për thirrjen si të pandehur të Sali Berishes, Jaho Mulosmanit, Zenel Nezës, dy motrat Aishe e Zylfie Haklaj, si dhe plakun e Haklajve, Muharrem Haklaj.

Mbrojtja do kërkojë edhe një material audio regjistrimi mes Fatmir Haklajt dhe Muharrem Haklajt, përmes së cilit pretendohet të arrihet në pafajësinë e Izet Haxhisë.

Kujtojmë se Haxhia ka qenë truproja i parë i Sali Berishes.

Në 2006-n, Izet Haxhia u arrestua në Turqi, ndërsa në maj të këtij viti ai u ekstradua në Shqipëri për të vuajtur dënimin me 25 vite burg që ka marrë nga të gjitha shkallët e gjyqësorit shqiptar për bashkëpunim në vrasjen e deputetit Azem Hajdari.

Ditën e sotme vetë Izet Haxhia nuk ishte në seancë, por përfaqësohej vetëm nga avokati i tij Idajet Beqiri. Në seancën e radhës të datës 2 tetor ora 10.00, mbrojtësi ligjor i Izet Haxhisë do të paraqesë kërkesën e tij për pafajësinë e të pandehurit Izet Haxhia si dhe provat me dëshmitarë. Në bazë të tyre, sipas mbrojtjes, vërtetohet plotësisht se Izet Haxhia nuk është bashkëpunëtor në krimin e vrasjes së ish-deputetit Azem Hajdari.