Gogu në Asamblenë e Noterisë: Siguri për aktet, transparencë për tarifat dhe më shumë shërbime për diasporën

Ministri i Drejtësisë, Toni Gogu, në daljen e tij të parë përpara Asamblesë së Noterisë, ka vënë theksin te nevoja për rritjen e sigurisë juridike të akteve noteriale, transparencën e tarifave dhe përmirësimin e shërbimeve për diasporën shqiptare.

Në fjalën e tij, Gogu theksoi se një nga sfidat kryesore të sistemit mbetet fakti që një pjesë e konsiderueshme e çështjeve civile në vend lidhen me kontrata dhe prona, çka sipas tij tregon se roli parandalues i noterisë duhet të forcohet më tej.

“Në Europë, kontrata që del nga noteri rrallë shkon në gjykatë. Në Shqipëri, shumë kontrata përfundojnë aty. Kjo është diferenca që duhet të mbyllim”, u shpreh ministri.

Siguria e akteve dhe problematikat me pronat

Ministri u ndal te situata e pasurive të paluajtshme, duke theksuar se titujt e fragmentuar dhe moskoordinimi i plotë i të dhënave krijojnë pasiguri si për qytetarët, ashtu edhe për noterët.

Sipas tij, do të punohet për forcimin e verifikimeve juridike dhe përmirësimin e ndërveprimit me Agjencinë Shtetërore të Kadastrës, në mënyrë që aktet noteriale të mbështeten në të dhëna më të sigurta dhe të shmangen konfliktet e mëvonshme.

Tarifat dhe besimi i qytetarëve

Një tjetër fokus i fjalës ishte edhe çështja e tarifave, ku Gogu theksoi se në disa raste konkurrenca zhvillohet mbi çmimin dhe jo mbi cilësinë e shërbimit.

Ai nënvizoi nevojën për më shumë transparencë dhe standard në tregun noterial, duke theksuar se “qytetari nuk paguan për një firmë, por për siguri juridike”.

Shërbime për diasporën shqiptare

Ministri i Drejtësisë theksoi gjithashtu rëndësinë e përmirësimit të aksesit për diasporën, duke e cilësuar këtë si një dimension të pazhvilluar sa duhet.

Ai njoftoi se do të shtyhen përpara shërbimet në distancë dhe zgjidhjet online, për të lehtësuar procedurat për qytetarët që jetojnë jashtë vendit.

Integrimi europian në praktikë

Në përmbyllje, Gogu theksoi se procesi i integrimit europian kërkon jo vetëm përafrim ligjor, por edhe standarde konkrete në praktikën e përditshme.

Sipas tij, cilësia e aktit noterial dhe siguria juridike që ai garanton janë tregues të drejtpërdrejtë të këtij standardi.

“Noteria është vendi ku drejtësia fillon — jo aty ku përfundon”, përfundoi ministri.