Gonxhja: Po e ndjekim protestën, kërkohet analizë e thellë dhe dialog

Ministri i Turizmit, Blendi Gonxhja, reagoi këtë të shtunë, 6 qershor, nga Pogradeci lidhur me protestat kundër projektit turistik në zonën e Zvërnecit, duke deklaruar se qeveria po i ndjek me vëmendje shqetësimet e ngritura dhe se kërkohet një analizë e kujdesshme dhe dialog.

“Ne e respektojmë protestën. Ajo protestë vjen edhe sepse liria në vend është, besoj sot, në nivelin më të lartë të saj. Prandaj nuk diskutohet, ne jetojmë në Tiranë dhe e kemi shumë të qartë që është një situatë e cila kërkon një vëmendje dhe kërkon një analizë, kërkon një reflektim shumë të thellë nga çdokush. Ne jemi duke marrë të gjitha masat që të jemi të përgatitur për të adresuar çdonjërën prej problematikave të protestës. Qoftë për zonën e Zvërnecit apo qoftë edhe për shembuj të ngjashëm, qoftë në rajon, qoftë në Shqipëri, të jemi të përgatitur që në një dialog, në një moment që ne do të kemi natyrisht nevojë të komunikojmë dhe të shkëmbejmë informacion me njëri-tjetrin, kuptohet kur kjo të jetë edhe në një formë më të organizuar dhe më të strukturuar, e cila deri tani nuk ka ndodhur sepse ka pasur, me sa duket, edhe vetë protesta nevojën e vet që të shfryjë”, ministri Gonxhja.

Tv Klan

/tvklan.al