Moti në fundjavë, IHK njofton edhe për kushtet biometeorologjike dhe agrometeorologjike

Instituti Hidrometeorologjik bën të ditur se fundjava në Kosovë do të jetë me diell dhe vranësira të shpërndara.

IHK njofton se të shtunën temperaturat minimale do të lëvizin nga 0°C deri në 3°C, ndërsa temperaturat maksimale do të arrijnë nga 10°C deri në 15°C.

Era do të fryjë nga drejtimi i verilindjes, me shpejtësi prej 1–4 m/s.

Edhe për të dielën parashikohet mot me diell dhe vranësira të shpërndara.

IHK njofton se temperaturat minimale do të lëvizin nga 0°C deri në 3°C, ndërsa temperaturat maksimale do të arrijnë nga 13°C deri në 17°C.

Era do të fryjë nga drejtimi i verilindjes dhe veriperëndimit, me shpejtësi prej 1–3 m/s.

Kushtet biometeorologjike

Kushtet biometeorologjike do të jenë përgjithësisht të favorshme për shumicën e njerëzve. Megjithatë, temperaturat e ulëta gjatë orëve të mëngjesit dhe të mbrëmjes mund të shkaktojnë ndjesi të theksuar të freskisë, veçanërisht te personat e moshuar dhe ata me sëmundje kronike. Rekomandohet veshje e përshtatshme për temperaturat e kësaj periudhe.

Kushtet agrometeorologjike

Temperaturat e ulëta gjatë orëve të mëngjesit kërkojnë kujdes të shtuar për kulturat bujqësore të ndjeshme ndaj të ftohtit, veçanërisht në zonat e ulëta dhe në vendet ku mund të krijohen kushte për paraqitjen e ngricave të hershme.

Fermerët këshillohen të kujdesen për kulturat e ndjeshme dhe t’i përshtatin aktivitetet bujqësore sipas kushteve të motit. Rritja e temperaturave maksimale të dielën do të krijojë kushte më të favorshme për kryerjen e punëve bujqësore gjatë ditës.