Granit Xhaka u përgjigjet kritikave: S’kam kafshuar askënd, kush ka problem me mua le të ma thotë!

Vetëm pak ditë më parë Granit Xhaka ka qenë në qendër të një artikulli të publikuar në mediet zviceriane ku sipas të cilit kapiteni me karakterin e tij ishte kthyer në një problem për grupin e lojtarëve. Në artikull burimi, i cili kishte kërkuar t’i ruhej anonimati, akuzonte kapitenin se prezenca e tij ishte kthyer në toksike për ambientin.

Përballë këtyre kritikave 33-vjeçari nuk ka qëndruar duarkryq dhe pasi tregoi sa vlente në fushë ku ishte autor edhe i njërit prej katër golave që shënoi Zvicra në fitoren me Bosnje dhe Hercegovinën, ai dha një intervistë sot për “SRF” ku shpjegoi se akuzat karshij tij nuk kishin bazë.

“Do të isha një gënjeshtar nëse do të thoja se ajo që kam lexuar në medie nuk më ka lënduar. Ajo që është shkruar për mua tani nuk ka asnjë rëndësi edhe pse jam i mendimit se përpara se të shkruhet diçka, faktet duhen verifikuar”, tha mesfushori, i cili numëron 148 ndeshje me Zvicrën.

Mes të tjerash ai tregon se nuk ka problem ballafaqimet. Ashtu si në fushë edhe jasht saj është i gatshëm gjithmonë që të vendosë rregull. “Mendoj se ata që nuk mund të metabolizojnë kritikat e mia duhet të shikojnë problemin diku tjertër. Nëse dikush ka një problem me mua le të vijë të më flasë, unë s’kam kafshuar askënd”, tha kapiteni duke mbyllur një herë e mirë polemikat. A.V.