Airbnb u ndalon pronarëve t’u kërkojnë mysafirëve larjen e enëve dhe heqjen e çarçafëve

Airbnb po ndërmerr hapa për të kufizuar punët që pronarët mund t’u kërkojnë mysafirëve para largimit, duke iu përgjigjur një ankese të kahershme të klientëve, të cilët paguajnë tarifa pastrimi dhe megjithatë u kërkohet të kryejnë vetë një listë detyrash, siç njofton TechCrunch.

Në përditësimin e ri të politikës, Airbnb u ndalon pronarëve t’u kërkojnë mysafirëve të heqin çarçafët, të lajnë e të sistemojnë enët, të nisin larjen e rrobave apo të nxjerrin plehrat nga prona. Rregullorja e re do të zbatohet për rezervimet e bëra nga 20 nëntori e tutje.

Ndryshimi vjen pas vitesh reagimesh për udhëzime largimi tepër të rënda dhe gjoba të majme për mosnxjerrjen e plehrave; shumë mysafirë janë ankuar në rrjetet sociale se pse duhet të pastrojnë vetë, kur tashmë kanë paguar tarifën e pastrimit. Ka megjithatë përjashtime: pronarët mund të kërkojnë ende kursimin e ujit gjatë thatësirave ose përdorimin e kontenierëve rezistentë ndaj arinjve në zonat ku kafshët e egra përbëjnë rrezik, siç raporton TechCrunch.

Por jo të gjithë pronarët janë të kënaqur: në forumet e komunitetit të Airbnb-së, disa argumentojnë se përgjegjësitë bazë të pastrimit janë thelbësore për higjienën dhe mbrojtjen e pronave të tyre. “Mysafirëve u jepet liri e plotë të jenë përtacë, ndërsa rreziku e mbajnë pronarët”, shkroi njëri prej tyre, duke paralajmëruar se mund ta tërheqë pronën nga platforma pas dymbëdhjetë vjetësh.

Politika e re nxjerr në pah sfidën e Airbnb-së për të balancuar pritshmëritë e mysafirëve me ato të pronarëve. Kompania u përball me kritika në vitin 2024 për transparencën e çmimeve, ndërsa që nga maji 2025 i shfaq çmimet totale — përfshirë tarifat, pa taksat — si parazgjedhje në rezultatet e kërkimit në mbarë botën.