Meta i ofron Zuckerberg-ut aksione të reja pa të drejtë vote për ta mbajtur në Kaliforni, pavarësisht taksës së miliarderëve

Meta Platforms ka nënshkruar një marrëveshje me drejtorin ekzekutiv Mark Zuckerberg për ta mbajtur atë banor në të njëjtin juridiksion ku ndodhet selia e kompanisë, pasi Zuckerberg kishte paralajmëruar se po shqyrtonte largimin nga Kalifornia nëse shteti miraton taksën e pasurisë për miliarderët, siç raporton Bloomberg duke iu referuar një dokumenti rregullator të depozituar të mërkurën.

Sipas dokumentit prej 109 faqesh të dorëzuar në Komisionin e Bursave dhe Letrave me Vlerë (SEC), gjatë një darke me anëtarët e bordit më 9 shtator Zuckerberg tha se po mendonte largimin për shkak të Propozicionit 40 dhe se planifikonte ta nxirrte në shitje shtëpinë e tij në Palo Alto katër ditë më vonë, siç shkruan Wired. Propozimi parashikon një taksë të njëhershme prej 5 për qind mbi aksionet dhe asetet e tjera të miliarderëve që ishin banorë të Kalifornisë në janar 2026.

Për ta bindur të qëndrojë, Meta do të krijojë një klasë të re aksionesh pa të drejtë vote, të cilat do t’u shpërndahen të gjithë aksionarëve ekzistues në përpjesëtim me zotërimet e tyre. Sipas “Marrëveshjes së Përafrimit me Themeluesin”, Zuckerberg mund të shesë 20 për qind të aksioneve të reja për të paguar taksat që mund t’i lindin, ndërsa 80 për qindëshin tjetër mund ta shesë pjesë-pjesë gjatë tetë viteve të ardhshme, për sa kohë që mbetet në Kaliforni — ose në juridiksionin ku Meta ka selinë qendrore.

Kompania thotë në dokument se taksa e propozuar mund t’i kushtojë Zuckerberg-ut një faturë shumë miliardëshe dhe ta detyrojë të shesë aksione me të drejtë vote, duke holluar kontrollin e tij mbi kompaninë që themeloi. Një komitet i posaçëm i bordit, ku bënin pjesë juristi Robert Kimmitt, investitori Charlie Songhurst dhe drejtori ekzekutiv i DoorDash, Tony Xu, u mor me çështjen dhe theksoi se nuk donte që kompania të përballej sërish me vështirësitë e periudhës së pandemisë, kur Zuckerberg nuk mund të ishte fizikisht pranë ekipit drejtues.

Zuckerberg nuk është miliarderi i vetëm që ka kërcënuar me largim: bashkëthemeluesi i Google, Sergey Brin, e ka zhvendosur rezidencën në Nevada, ndërsa sondazhet e fundit e tregojnë Propozicionin 40 pak poshtë mbështetjes së shumicës. Marrëveshja me Meta-n synon, sipas dokumentit, ta mbajë Zuckerberg-un në krye të kompanisë nga Kalifornia, pranë laboratorëve të inteligjencës artificiale Meta Superintelligence Labs.