GREQI – Mbi 280 arrestime për zjarre, 29 raste për zjarrvënie të qëllimshme

– Më shumë se 280 persona janë arrestuar në Greqi që nga fillimi i vitit për vepra penale të lidhura me zjarret, njoftoi shërbimi zjarrfikës, ndërsa vendi vijon të jetë në gatishmëri të lartë për shkak të rrezikut të përhapjes së vatrave të reja, sipas euractiv.com.

Sipas zëdhënësit të shërbimit zjarrfikës, Yannis Atropios, 281 persona janë arrestuar që nga janari.

Prej tyre, 252 janë arrestuar për zjarre të shkaktuara nga pakujdesia, ndërsa 29 për zjarrvënie të qëllimshme.

Numri i arrestimeve është më i ulët se në dy vitet e mëparshme, pasi qeveria greke ka forcuar në vitet e fundit dënimet ndaj personave të shpallur përgjegjës për shkaktimin e zjarreve.

Sipas të dhënave të shërbimit zjarrfikës grek, gjatë periudhës janar-gusht 2024 u kryen 360 arrestime të lidhura me zjarret, ndërsa 12 persona u vendosën në paraburgim.

Në të njëjtën periudhë të vitit 2025 u regjistruan 315 arrestime dhe nëntë persona u vendosën në paraburgim.

Arrestimet për zjarrvënie të qëllimshme kanë shënuar gjithashtu një rritje të vazhdueshme.

Legjislacioni grek parashikon tashmë dënime deri në 20 vjet burg dhe gjoba deri në 200 mijë euro për personat përgjegjës për shkaktimin e zjarreve.

Ndërkohë, Greqia mbetet në gatishmëri të lartë për shkak të kushteve të favorshme për përhapjen e zjarreve.

Vetëm pak ditë më parë, një zjarr i madh pranë një zone turistike bregdetare në veriperëndim të Athinës shkatërroi më shumë se 11 000 hektarë pyje me pisha, shkurre dhe toka bujqësore.

Zjarri u vu nën kontroll pas pesë ditësh për shkak të erërave të forta, të cilat vështirësuan ndjeshëm operacionet e forcave zjarrfikëse.

Autoritetet greke vijojnë të monitorojnë situatën në të gjithë vendin dhe u kanë bërë thirrje qytetarëve të tregojnë kujdes të shtuar, veçanërisht në zonat me rrezik të lartë për shpërthimin dhe përhapjen e zjarreve./ a.jor.