Greqi, rrëzohet helikopteri ushtarak; 3 viktima

Një helikopter i forcave të marinës greke është rrëzuar gjatë orëve të natës në vendin e qujtur Kinaros, në afërsi të ishullit Leros, në Egje. Sipas njoftimit të marinës greke, helikopteri merrte pjesë në manovrën e përvitshme “Rrufeja”. Autoritetet greke thonë se nuk ka të shpëtuar nga tragjedia. Tre viktimat janë ushtarakë me eksperiencë të gjatë.
Mësohet se helikopteri ishte ngritur nga një fregatë e marinës dhe po kryente një mison rikonjicioni në kuadër të manovrës së programuar më parë. Sipas marinës, gjurmët e tij humbën nga radarët e ushtrisë në orën 02.45.
Menjëherë filloi operacioni i shpëtimit, por deri në orët e mëngjesit u bë e mundur vetëm gjetja e disa copave të shkatërruara në afërsi të një ishulli shkëmbor, për të cilat besohet se janë pjesë të helikopterit të zhdukur.
Ministri i Mbrojtjes, Panos Kamenos, shprehu keqardhjen e tij për ngjarjen dhe ngushëlloi familjarët e viktimave. Ai njoftoi hapjen e një hetimi për shkaqet e tragjedisë.
Që prej fillimit të krizës ekonomike në Greqi, forcat e armatosura greke po përballen me mungesën e fondeve për mirëmbajtjen e tyre. Shpesh referohen mungesa të theksuara në pjesë këmbimi dhe bazë materiale.