“Hajdeni një ditë para”- Berisha thirrje nga grupi i PD për protestën kombëtare të enjten para Parlamentit: Pa flamuj

Kreu i Partisë Demokratike, Sali Berisha, ka paralajmëruar se një protestë rinore dhe qytetare, pa simbole politike, pritet të zhvillohet më 8 tetor kundër Reformës Territoriale.

Berisha, në fjalën para grupit të PD, ka paralajmëruar zhvillimin e protestës, duke e lidhur atë me kundërshtimet ndaj reformës së propozuar dhe ndryshimeve në hartën administrative të vendit.

Sipas Berishës, reforma parashikon shkrirjen e 15 bashkive të tjera, duke i cilësuar ndryshimet si një vendimmarrje që prek drejtpërdrejt komunitetet lokale.

“Me një të rënë të lapsit, shuhen 15 bashki të tjera”, deklaroi Berisha, duke bërë thirrje për pjesëmarrje në protestën e 8 tetorit.

Ai bëri thirrje për të gjithë mbështetësit që të vinin edhe një natë para në Tiranë.

“Protesta është në orën 10:00 para Parlamentit kundër Reformës Territoriale. Protestë rinore, pa flamuj dhe simbole partiake. Hajdeni edhe 1 ditë para në Tiranë, është protestë e rëndësishme”, tha ai mes të tjerash.