Hamza fajëson Vetëvendosjen për situatën politike: Dhuna e mbrëmjes së djeshme në protestë ishte “jo proporcionale”

Kreu i Partisë Demokratike të Kosovës, Bedri Hamza, ka akuzuar Lëvizjen Vetëvendosje për pavendosmëri, duke e mbajtur atë përgjegjëse për situatën e krijuar politike në vend, siç njofton KosovaPress.

“Unë nuk besoj që vendi duhet të shkoj në zgjedhje. Unë besoj se duhet të ketë stabilitet politik, institucional. Ka pasur opsione, nuk të pëlqen me PDK-në, bëje me Lidhjen Demokratike të Kosovës… Prandaj, [Vetëvendosje] është përgjegjëse për situatën e krijuar në vend”, tha Hamza.

Në të njëjtën deklaratë, Hamza shprehu keqardhje për eskalimin e protestës në mbrëmjen e djeshme para Kuvendit të Kosovës, duke i quajtur veprimet e dhunshme jo proporcionale. “Më vjen keq për ato që kanë ndodhur në mbrëmje, unë normalisht që kërkoj që gjithçka të jetë demokratike ligjore, por realisht dhuna e përdorur… nuk është mirë t’i shohim këto skena nga qytetarët e Kosovës, dhuna ka qenë jo proporcionale”, tha ai.

Më 5 tetor situata u tensionua para Kuvendit të Kosovës: protestuesit hodhën mjete piroteknike drejt ndërtesës, ndërsa Policia përdori gaz lotsjellës e topa uji. Protesta u shpërnda pas mesnatës, por qytetarët janë rikthyer sot në orën 09:00 para Kuvendit, duke kërkuar votimin në lexim të dytë të ndryshimeve në Ligjin për Dhomat e Specializuara.