Haxhinasto në Xibrakë: Ndërhyrje serioze për riparimin e rrugës

Ministri i Transportit dhe Infrastrukturës, Edmond Haxhinasto ka parë nga afër dëmin që është shkaktuar në segmentin Elbasan- Librazhd në zonën e Xibrakës, ku ka rrëshqitur një pjesë e rrugës.

Ministri Haxhinasto deklaroi se kjo ka ardhur për arsye të prurjeve të pazakonta të lumit Shkumbin, por gjithashtu kjo shembje ka nxjerrë në pah edhe një sërë defektesh të këtij segmenti rrugor.

Ministri theksoi se do të kërkohet një hetim i mirëfilltë, si nga ana teknike dhe nga ana e përgjegjësive të tjera ligjore. Ministri tha se nuk duhet harruar se rruga ka disa vite që është realizuar, mbi 10 vite, por një shkarje e tillë tregon defektet edhe në cilësinë e punimeve.

Por pavarësisht situatës, Ministri tha se qëllimi i ARRSH-së është që ta riparojë sa më shpejt këtë defekt, ku do të kërkohet një ndërhyrje serioze, sepse përmasa e dëmtimit është e madhe. “Objektivi i ARRSH-së nuk është vetëm riparimi i kësaj pjese të rrugës por edhe ruajtja e pjesës tjetër”, përfundoi Ministri për mediat