Hegseth urdhëron një ditë pushim për ushtarakët amerikanë për të votuar në zgjedhjet e mesmandatit

Kreu i Pentagonit, Pete Hegseth, urdhëroi të gjitha komandat ushtarake të ndalin operacionet për një ditë brenda dy javëve të ardhshme, për t’u dhënë ushtarakëve amerikanë kohë për të votuar në zgjedhjet e mesmandatit të nëntorit, siç njofton USA Today.

Në një mesazh video të publikuar në rrjetet sociale më 2 tetor, Hegseth tha: “Ne nuk po ju themi se për kë të votoni, por do t’ju japim çdo mundësi për ta bërë këtë.” Sipas memorandës së datës 1 tetor, urdhri autorizon një “stand down” njëditor çdo tetor në vite zgjedhore, duke nisur nga 2026-a.

“Stand down” është një term ushtarak që do të thotë pezullim i operacioneve të rregullta për të lejuar personelin të pushojë. Një urdhër i tillë në gjithë ushtrinë është i rrallë: ish-sekretari i Mbrojtjes, Lloyd Austin, kishte urdhëruar një “stand down” në vitin 2021 për të luftuar ekstremizmin e djathtë në radhët e ushtrisë.

Hegseth kishte publikuar më parë një video tjetër ku shpjegonte se si votojnë ushtarakët me fletën federale të votimit me postë; urdhri i ri synon t’u japë më shumë kohë për këtë. Ai tha se në të kaluarën, votimi për uniformuarit ka qenë i ngadaltë dhe kompleks. Në memo thuhet gjithashtu se “të gjitha aktivitetet e ndihmës për votim duhet të mbeten rreptësisht jopartiake”.

Nisma vjen një muaj para zgjedhjeve të mesmandatit, ndërkohë që Hegseth është parë aktiv në fushatën zgjedhore: mori pjesë në një tubim për Ed Gallrein, ish-SEAL i Marinës që mundi kongresistin Thomas Massie në primaret republikane të Kentakit, dhe mbajti një fjalim në gusht për kongresistin Zach Nunn në Iowa. Massie, para se Dhoma e Përfaqësuesve të shkonte në pushim, kishte paraqitur artikuj impeachment-i kundër Hegseth për vazhdimin e luftës amerikane kundër Iranit pa miratimin e Kongresit.

Në një fjalim të mbajtur më 30 shtator para trupave në bazën e Korpusit të Marinës në Quantico, Hegseth kritikoi Austin dhe ish-kryetarin e Shtabit të Përgjithshëm Mark Milley, duke u zotuar për një kulturë “vetëm të etosit luftarak” në Pentagon.