“IBAR u amendua për…”, Berisha: Brukseli po sinjalizon probleme serioze

Kryetari i Partisë Demokratike, Sali Berisha duke folur në tryezën ‘Gratë politikane të rajonit, Suedisë dhe EPP-së bashkë për Integrimin’, është shprehur se integrimi në Bashkimin Europian është prioritet për demokratët. Por sipas tij, Shqipëria po rrëshqet drejt autokracisë dhe këtë e kanë konfirmuar edhe raportet ndërkombëtare.

“Integrimi në Bashkimin Evropian për Shqipërinë dhe për Partinë Demokratike është prioriteti kryesor. Sepse ne besojmë se një e ardhme në BE do të thotë më shumë liri, më shumë mirëqenie dhe më shumë siguri për qytetarët shqiptarë.  Kjo është arsyeja pse për partinë tonë ky është prioriteti kryesor i programit.

Ne besojmë se ky proces duhet të bazohet në meritë. Vetëm një proces i bazuar në meritë u garanton qytetarëve tanë liritë dhe të drejtat e njeriut, një drejtësi të pavarur, një ekonomi funksionale tregu dhe ‘acquis communautaire’ për vendin. Shqipëria sot ndodhet në një moment shumë të veçantë. Pak muaj më parë, V-Dem e klasifikoi Shqipërinë si një autokraci elektorale. Në fakt, autokracitë elektorale janë diktatura autokratike në kuptimin që ato e pranojnë pluralizmin, por e shtypin atë”, tha Berisha.

Sipas Berishës, qeveria po përpiqet ta monopolizojë procesin e integrimit, ndërsa shtoi se edhe zhvillimet e fundit me amendimin e rezolutës (IBAR) në BE pasqyrojnë problematikat serioze të vendit me korrupsionin dhe sundimin e ligjit.

“Pavarësisht faktit se qeveria përpiqet ta mbajë atë pothuajse si proces të ndarë, jo vetëm për opozitën, por gjithashtu për publikun dhe shoqërinë civile. Ne qëndruam fort ndaj këtij zotërimi të këtij procesi dhe njëfarë përparimi është bërë. Disa gjëra u arritën në këtë drejtim, por përsëri ne këmbëngulëm.

IBAR u votua sot për Shqipërinë, por siç e keni dëgjuar ju, u amendua.  U amendua në mënyrë serioze pas qëndrimit të qeverisë ndaj hetimeve, ndaj drejtësisë, ndaj luftës kundër korrupsionit. Pra, ka pasur reflektime të mëdha të problemeve për t’u adresuar.  Shpresoj që Bashkimi Evropian do ta mbajë fokusin te rajoni ynë. Rajoni ynë është i rëndësishëm”, shtoi ai.

/tvklan.al