Ibra “thumbon” popullin kuqezi: Në Amerikë tifozët janë më të qetë, në Europë të presin poshtë shtëpisë

Pas muajsh kritikash nga tifozët, Zlatan Ibrahimovic ka folur sërish nga SHBA, ku do të punojë si komentator televiziv gjatë Botërorit. Këshilltari aktual i “RedBird” u ndal te ndryshimet mes tifozëve amerikanë dhe atyre europianë.

“Kur luaja te Galaxy, kur humbnim dilja nga stadiumi dhe shihja tifozë që qeshnin, hanin tacos dhe të prisnin pranë makinës. Me pak fjalë, qasja ishte e butë”, – tha Ibrahimovic.

Më pas suedezi krahasoi atmosferën me atë që ka përjetuar në Europë: “Në Europë, nëse humbet një ndeshje, tifozët nuk të presin pranë makinës, të presin poshtë shtëpisë tënde. Për shembull, kur luaja te PSG, na hidhnin thika në fushë”.

Deklarata e ish-sulmuesit të Milanit ka tërhequr menjëherë vëmendje, sidomos për mënyrën se si përshkroi pasionin dhe presionin shumë më të madh që futbollistët përjetojnë në Europë krahasuar me SHBA.