Intel vazhdon bashkëpunimin me Musk-un për projektin e fabrikës së çipave Terafab, thotë CEO Lip-Bu Tan

Intel-i do të vazhdojë të punojë me Elon Musk-un në projektin ambicioz të prodhimit të çipave “Terafab”, deklaroi shefi ekzekutiv i kompanisë amerikane, Lip-Bu Tan, siç raporton Bloomberg News të mërkurën. Deklarata u bë përpara një eventi në Tokio që shënon 50-vjetorin e operacioneve të Intel-it në Japoni.

Sipas raportimit të Bloomberg-ut, Tan konfirmoi se Intel-i mbetet i përfshirë në projekt, edhe pse javën e kaluar Musk zbuloi në platformën X se ka pasur bisedime edhe me gjigantin tajvanez të çipave TSMC për një bashkëpunim të mundshëm rreth Terafab-it. Të shtunën, Musk iu përgjigj një artikulli me titullin “TSMC Exploring Plans to Work With Elon Musk’s TeraFab” duke shkruar: “Just discussions, but something may come of it” (“Vetëm bisedime, por diçka mund të dalë prej tyre”).

Një përfshirje e mundshme e TSMC-së mund ta sfidojë rolin e Intel-it në Terafab, teksa Musk po peshon partnerët për sipërmarrjen e prodhimit të çipave, vë në dukje Reuters. Intel dhe Tesla nuk iu përgjigjën menjëherë kërkesave për koment jashtë orarit të punës.

Terafab është nisma e Musk-ut për ndërtimin e një fabrike gjigante të gjysmëpërçuesve, një garë ku përfshihen emrat më të mëdhenj të industrisë së çipave. Deklarata e Tan në Tokio duket se synon të sigurojë pozicionin e Intel-it në këtë projekt, në një kohë kur industria e gjysmëpërçuesve është në qendër të garës globale për infrastrukturën e inteligjencës artificiale.