Inter e nis vrullshëm merkaton, transferimi i parë do të jetë për shifrën 50 milionë euro

Sipas La Gazzetta dello Sport dhe shumë burimeve të tjera mediatike nga Italia, Inter është shumë afër transferimit të Marco Palestra. 21-vjeçari shkëlqeu në sezonin e fundit në Serie A, ku ishte i huazuar te Cagliari, ndërsa tani është rikthyer tek Atalanta.

Shifra e kërkuar nga Atalanta është 50 milionë euro dhe tek Inter janë të vetëdijshëm, që klubi bergamask nuk ka për të lëvizur aspak nga shuma e kërkuar.

Palestra do të jetë transferimi i dytë më i shtrenjtë në historinë e Interit, duke lënë pas emra të njohur si Christian Vieri, Joao Mario etj. Ndërsa vendi i parë mbahet nga Romelu Lukaku, për të cilin zikaltrit paguan 74 milionë euro në vitin 2019.

Ardhja e Palestra hap rrugën për largimin e Denzel Dumfries. Për holandezin ka interes konkret nga Barcelona dhe Liverpool. Ai ka një klauzolë largimi prej 25 milionë eurosh.