IRMCT vlerëson rezultatet e Prokurorisë Speciale në procesimin e krimeve të luftës

Rezultatet e arritura të Prokurorisë së Posaçme Shtetërore në procesimin e krimeve të luftës dhe bashkëpunimi i suksesshëm shumëvjeçar me Mekanizmin Ndërkombëtar Rezidual për Gjykatat Penale (IRMCT) ishin tema e takimit të sotëm në Podgoricë, siç njofton CdM.

Kryeprokurori i Shtetit, Milorad Markoviq, dhe kryeprokurori special, Vladimir Novoviq, u takuan me zëvendësprokurorin e IRMCT-së, Kevin Hughes, dhe me këshilltaren ligjore Abir Hasan. Në takim mori pjesë edhe prokurorja speciale Tanja Çolan Deretiq.

Sipas njoftimit të Prokurorisë Supreme të Shtetit, të cilin e përcjell CdM, bashkëbiseduesit theksuan rëndësinë e rezultateve të arritura nga Prokuroria e Posaçme në punën me lëndët e krimeve të luftës dhe në forcimin e kapaciteteve prokuroriale.

Vlerësimi pozitiv i përfaqësuesve të Mekanizmit Ndërkombëtar, sipas njoftimit, konfirmon rëndësinë e përpjekjeve të bëra dhe të përparimit të arritur në procesimin e krimeve të luftës, në përputhje me legjislacionin vendas dhe standardet ndërkombëtare. Prokuroria e Shtetit, siç u vlerësua në takim, mbetet e përkushtuar të veprojë me efikasitet dhe profesionalizëm në këto lëndë.

Takimi ishte pjesë e aktiviteteve përgatitore të Zyrës së Prokurorit të IRMCT-së për hartimin e raportit gjashtëmujor që i paraqitet Këshillit të Sigurimit të Kombeve të Bashkuara.